Numrimi i votimit të rezultateve është drejt përfundimit, kandidati për kryeministër nga Lidhja Demokratike e Kosovës (LDK), Lumir Abdixhiku, ka reaguar mbi rezultatet e para të zgjedhjeve të 28 dhjetorit. Ai pranoi se ky rezultat nuk ishte ai që ai kishte pritur dhe se ka ardhur momenti për reflektim të thellë dhe përgjegjësie.
Në një konferencë për media, Abdixhiku theksoi:
“Rezultati i LDK-së nuk është ai që e kemi pritur, ai që unë si kryetar kam dëshiruar ta shoh. Është një moment reflektimi i thellë, i përgjegjësisë. Kur qytetarët flasin, ne duhet t’i dëgjojmë. Kur populli jep verdiktin, ne duhet ta respektojmë.”
Ai shtoi se, gjatë fushatës, ka bërë gjithçka që besonte se ishte më e mira për LDK-në, por se gjithsesi, ky nuk ishte rezultati që ai kishte pritur:
“Këto pesë vite që kam udhëhequr me LDK-në, kam bërë dhe vepruar ashtu siç kam besuar që është më e mira. Megjithatë, sot duhet të them hapur se nuk kam arritur ta çojë LDK-në aty ku kam besuar se duhet të jetë. Kemi bërë fushatë dinjitoze që nuk i ka munguar asgjë në përkushtim, por ky është verdikti qytetar. Qytetari gjithmonë ka të drejtë.”
Abdixhiku e theksoi gjithashtu rëndësinë e unitetit dhe rinovimit të partisë për t’u përballur me sfidat që vijnë. Ai shpreson se mbështetësit e LDK-së janë përfaqësuar me dinjitet dhe ka bërë thirrje për një reflektim të thellë në këto momente sfiduese:
“Dua të shpresoj që mbështetësit e LDK-së t’i kem përfaqësuar me dinjitet. Një gjë do ta mbaj mend se LDK ka qenë dhe do të mbetet shtëpia e Kosovës dhe sot, në këtë moment sfide, LDK ka nevojë për unitet. Ka nevojë të dëgjojë më shumë, të rinovohet më shumë.”
Për të adresuar këto çështje dhe për të siguruar një të ardhme më të fortë për LDK-në, Abdixhiku njoftoi se do të thërrasë Kuvendin e LDK-së për një diskutim të hapur:
“Për këtë arsye do të thërras menjëherë kuvendin e LDK-së dhe para tij do t’i shpalos të gjitha çështjet dhe përgjegjësinë që mbaj unë si kryetar,” përfundoi Abdixhiku.
