Lidhja Demokratike e Kosovës ka publikuar pjesën e dytë të programit të partisë, “Rruga e Re”.
Një nga zotimet është edhe rritja e koeficientit për pagat e sektorit publik, 125 euro në vitin e parë të mandatit dhe 135 në atë të fundit.
Disa prej premtimeve të kësaj partie janë projekte infrastrukturore, përfshirë stadiume rajonale dhe kodimi në shkolla që sipas LDK-së, do të bëhet i obligueshëm.
“PJESA E DYTË e 100 projekteve dhe zotimeve kryesore të ‘Rrugës së Re’. Ju faleminderit për gjithë interesin e treguar dhe mbështetjen e dhënë ndaj pjesës së parë. Këto, vlerat e orientimet themelore, do t’i shpalosim në Konventën e ardhshme të Lidhjes Demokratike të Kosovës; dhe nga aty në çdo komunikim pas. Kemi një program të detajuar, të bëshëm e zhvillimor. Një që i përgjigjet sfidave dhe krizave të kohës. Një që na nxjerrë nga ngufatja e tanishme e zymtësia mbytëse. Le të flasim për të ardhmen. Ajo është e ndritshme. ‘Rruga e Re’ na shpie atje. Ne kemi gjetur rrugën përpara; është koha ta bëjmë të njëjtën së bashku”, ka thënë Abdixhiku.
Teksa ka paralajmëruar një konventë të kësaj partie ku sipas tij, do të bëhet shpalosja e zotimeve për synimin e LDK-së për ta qeverisur Kosovën.
Kurse gjatë ditës Abdixhiku, prezantoi 50 premtimet e para të programit “Rruga e Re” që përfshinë 100 projekte.
Nga premtimet e publikuara, Abdixhiku përmendi një shpërblim prej 5 mijë eurove për familjet, të cilat vendosin të kenë tre fëmijë.
