Kryetari i LDK-së, Lumir Abdixhiku ka pritur sot në takim shefin e EULEX-it, Giovanni Pietro Barbano.
Sipas një njoftimi të LDK-së, në takim u diskutua për sundimin e ligjit dhe demokracinë në Kosovë, e ndër të tjerash edhe për situatën në veri, përcjell teve1.info
“Gjatë takimit u adresuan tre çështje të rëndësishme. Së pari, u diskutua lidhur me sundimin e ligjit dhe demokracinë në Kosovë, në kuptim të evitimit të tendencave jokushtetuese dhe jodemokratike të ndërhyrjeve në sistemin e drejtësisë. U fol gjithashtu për situatën në veri dhe planin shtatë pikësh të LDK-së për deeskalim të situatës, duke vendosur gjithmonë fokusin në fuqizimin e sundimit të ligjit në veri në koordinim të plotë me aleatët tonë”, thuhet në njoftim.
Tutje bëhet e ditur se Abdixhiku e njoftoi Barbanon për programin politik të LDK-së – “Rruga e re” për Kosovën.
“Kryetari Abdixhiku e njoftoi Z. Barbano edhe për programin politik të LDK-së “Rruga e Re” për Kosovën, ku u vendos në pah përmbajtja e pasur me mbi 30 kapituj të një koncepti plotësisht zhvillimor të Kosovës. Kryetari Abdixhiku shprehi gatishmërinë për komunikim të vazhdueshëm për të siguruar njoftimin e ndërsjellë për procese të rëndësisë publike”, theksohet në komunikatë. /Teve1.info/
