Kryetari i Lidhjes Demokratike të Kosovës , Lumir Abdixhiku, ka pritur sot në selinë e partisë të Dërguarën e Posaçme të Britanisë së Madhe për Ballkanin Perëndimor, znj. Karen Pierce.
Në fokus të takimit ishin zhvillimet politike aktuale në Kosovë, me theks të veçantë kriza institucionale dhe nevoja për funksionalizimin urgjent të institucioneve demokratike.
“Diskutuam për zhvillimet më të fundit politike në vend, me theks të veçantë mbi krizën institucionale që po e pengon funksionalizimin e institucioneve të Kosovës. Nënvizova domosdoshmërinë urgjente për krijimin e institucioneve legjitime dhe funksionale,” tha Abdixhiku.
Ai theksoi se zvarritja e këtij procesi po ndikon drejtpërdrejt në jetën e përditshme të qytetarëve, ndërsa ritheksoi përkushtimin e LDK-së për një qeverisje të përgjegjshme dhe funksionale.
Një pjesë e rëndësishme e takimit iu kushtua edhe rrugëtimit të Kosovës drejt integrimeve euroatlantike. Abdixhiku tha se Kosova duhet të shfrytëzojë momentumin aktual gjeopolitik dhe të vendoset përkrah vendeve si Shqipëria dhe Mali i Zi, duke mos mbetur peng i ngecjeve me Serbinë.
“Kosova duhet të vendosë veten në rresht me Shqipërinë dhe Malin e Zi; jo në ngecje me Serbinë. Për këtë na duhet një qeveri e përgjegjshme që shfrytëzon mundësitë historike,” u shpreh ai.
Në fund të takimit, Abdixhiku falënderoi Mbretërinë e Bashkuar për mbështetjen e vazhdueshme ndaj Kosovës në proceset shtetformuese dhe demokratike, duke e cilësuar vizitën e Pierce si një mundësi të çmuar për thellimin e bashkëpunimit ndërmjet dy vendeve.
