Në ditën e pestë të fushatës zgjedhore për zgjedhjet lokale të 12 tetorit Lidhja Demokratike e Kosovës ka mbajtur një tubim në Komunën e Shtimes.
Kryetari i LDK-së, Lumir Abdixhiku ka thënë se fitorja në këtë komunë është fitorja e shpresës mbi mashtrimin, e punës mbi propagandën dhe e së ardhmes mbi të kaluarën.
Ai ka theksuar se kandidati i LDK-së, Kastriot Shabani do ta kthej besimin në punë konkrete, në projekte të prekshme dhe shërbim të denjë për qytetarët.
“Shtime, sonte treguat se jeni gati për ndryshim dhe se LDK është gjithmonë shpresë e qytetarëve të vet. Kandidati ynë, Kastriot Shabani, dhe ekipi i LDK-së për Shtimen janë gati ta kthejnë këtë besim në punë konkrete, projekte të prekshme dhe shërbim të denjë për qytetarët. Fitorja në Shtime është fitorja e shpresës mbi mashtrimin, e punës mbi propagandën, e së ardhmes mbi të kaluarën. Le të fitojmë! LDK është parti që gjithmonë ka ditur të qeverisë me përgjegjësi. Në kohët më të vështira, kur vendi kishte nevojë për stabilitet, ishte LDK ajo që solli stabilitet. Kur vendi kishte nevojë për shtet, ishte LDK ajo që ndërtoi shtetin. Kur vendi kishte nevojë për institucione, ishte LDK ajo që ngriti institucionet. Dhe sot, kur vendi ka nevojë për shpresë, është LDK ajo që sjell shpresë. Kur vendi ka nevojë për zhvillim, është LDK ajo që sjell zhvillim. Kur vendi ka nevojë për integrim, është LDK ajo që sjell integrim”, ka shkruar ai në Facebook.
