Kryetari i Lidhjes Demokratike të Kosovës, Lumir Abdixhiku ka thënë se anulimi i mbledhjes së përbashkët ndërmjet Qeverisë së Kosovës dhe Shqipërisë është lajm i keq për të gjithë shqiptarët.
Ai ka thënë se Kosova për fatin e keq po vazhdon të rrugëtojë drejt izolimit duke thënë se kësaj radhe mbetëm edhe pa Shqipërinë.
“Lajmi për anulimin e mbledhjes së përbashkët të dy qeverive është lajm i keq për shqiptarët, në Kosovë, në Shqipëri, në Luginë, Maqedoni e Mal të Zi. Kosova fatkeqësisht vazhdon të rrugëtoj drejt izolimit e vetmisë. Këtë herë, si asnjëherë, mbetëm dhe pa Shqipërinë. Po mbesim dhe do të mbesim pa secilin aleat që qëndronte me ne në çdo etapë të vështirë. Kjo s’është Kosova që e kishim menduar ndonjëherë”, ka shkruar Abdixhiku, përcjell teve1.info
Ai ka thënë se Kurti po rrezikon shtetësinë e Kosovës
“Rrugëtimi i Kurtit, përplasë me perëndimin, rrezikon vet shtetësinë e Republikës. Në vend se të sillet si një Kryeministër i përgjegjshëm, një që ruan partneritetet e avancon kauzat kombëtare drejt perëndimit, ai sjellë krizë dhe izolim. Aventura e tij politike nuk mund të jetë përfaqësimi ynë popullor. Kosovës i duhen miqtë. Kosovës i duhen partnerët strategjik”, ka shkruar Abdixhiku në Facebook.
Kryeministri i Shqipërisë, Edi Rama ka njoftuar për anulimin e kësaj mbledhje, duke e arsyetuar me zhvillimet e fundit në veri dhe raportin e Kurtit me ndërkombëtarët.
Për këtë vendim ka reaguar edhe Qeveria e Kosovës e cila ka thënë se për herë të parë anulohet një mbledhje e përbashkët në mënyrë të një anshme.
