Kryetari i Lidhjes Demokratike të Kosovës (LDK), Lumir Abdixhiku deklaroi se Lëvizjes Vetëvendosje i duhet reformatim i thellë, meqë sipas tij, fakti që s’ka zgjidhje me 48 deputetë është “shenjë që diçka nuk është rregull”.
Pas prezantimit të planit 15-pikësh të Qeverisë së Unitetit, Abdixhiku tha se partia fituese në mëngjes akuzon për bashkëpunim me Listën Serbe , e në mbrëmje dërgon letër për bashkëpunim.
“Ne besojmë thellësisht që Lëvizjes Vetëvendosje i duhet një reformatim i thellë, mënyrën se si bën politikë, mënyrën se si diskuton me partnerët. Fakti që e vendos në korner vetën në qosh, dhe s’del zgjidhje me 48 deputetë, do të duhej të ishte shenjë e mjaftueshme për një parti që diçka s’është në rregull me ju. S’mund të operosh me idenë që në mëngjes i akuzon të gjithë të tjerët, deri në bashkëpunim me Listën Serbe dhe në mbrëmje dërgon letër për bashkëpunim. Kështu s’ndodh politika. Mund t’i ketë funksionuar në të kaluarën, por me mua s’i funksionon kjo punë, as atij as askujt”, u shpreh Abdixhiku.
Ai tha se partia fituese nuk ka qeveri legjitime, meqë po funksionon me rezultat të para katër vitesh.
Kryetari i LDK-së, Lumir Abdixhiku ka folur edhe për arrestimin e ish-zyrtarit policor, Arbnor Spahiu nga autoritet serbe. Ai i ka bërë thirrje komunitetit ndërkombëtar që të bëjnë përpjekje për lirimin dhe kthimin e tij në Kosovë.
“Ndjej shumë keqardhje për mos-reagimin institucional, të plotë dhe të menjëhershëm ndaj këtij arresti dhe për më tepër ndjej keqardhje që në ditën e arrestimit po zhvillohej në Bruksel një proces i quajtur i dialogut i ndërmjetësimit të dialogut me një përfaqësues jo-legjitim të Republikës, i cili nuk kishte as kompasin më të vogël moral që të refuzojë atë takim pa lirimin e policit të Njësisë Speciale në Kosovë. Gjëja më e parë e mundshme që do duhej të ndodhte para këtij takimi është kërkesa për lirim, sepse është arrestuar besoni ose jo një polic i Republikës së Kosovës që ka luftuar me terroristë, e përfaqësuesi jo-legjitim i Kosovës ulet në tavolinë dhe flet për dialogun me Serbinë”, tha ai.
Ai në konferencë për media tha se në krye të qeverisë së unitetit duhet të jetë një dikush që përfaqëson unitetin, duke përjashtuar krerët e partive politike.
Pas prezantimit të planit 15-pikësh të qeverisë së unitetit, Abdixhiku tha se LDK nuk ka asnjë kërkesë dhe se e kanë lënë interesin vetanak.
“Ne e kemi lënë interesin tonë vetanak, asnjë kërkesë LDK nuk e ka nga kjo qeveri e unitetit, asnjë, zero. Përveç pikave që i kemi prezantuar sot këtu. Pra, kemi bërë një lëvizje, nëse kjo lëvizje e jona refuzohet le të jetë e tillë është e drejtë e jona të insistojmë, të provojmë sepse besojmë se duhet të ketë arsye dhe do të ketë arsye në një pikë të caktuar. Sepse besojmë se s’mund të jemi kaq indiferent në mbledhje të pafundme në Kuvendin e Kosovës, pa qeveri me legjitimitet e me kriza të vazhdueshme të qytetarëve të Kosovës teksa kemi shndërruar skenën politike me një show të trishtueshëm politike”, shtoi ai.
Ai tha se shkuarja në zgjedhje të jashtëzakonshme është papërgjegjësi e madhe ndaj vendit.
“Po, mund të shkohet në zgjedhje, por edhe për zgjedhje duhet të ulemi. Por është papërgjegjësi e madhe ndaj vendit. Shumë papërgjegjësi e madhe. Secili njeri sot në Kosovë që flet për zgjedhje të reja e vazhdimësi të krizës edhe pas zgjedhjeve të reja, nuk bën as përpjekjen më të vogël për të krijuar institucionet e Republikës së Kosovës. Po shkojmë në zgjedhje, në qoftë se partitë tjera vendosin të shkojmë në zgjedhje, shkojmë në zgjedhje. Nuk është çështje kjo. Më së lehti është të shkojmë në zgjedhje dhe më pas të mos kemi legjitimitet të plotë edhe për një vit tjetër”, u shpreh ai.
Deputetët mblidhen sërish nesër në Kuvendin e Kosovës, në përpjekjen e 31-të për konstituim të plotë të legjislaturës së nëntë./KP/
