Kryetari i LDK-së, Lumir Abdixhiku ka kujtuar Fehmi Aganin në 25-vjetorin e vdekjes së tij.
Përmes një postimi në Facebook, Abdixhiku ka shkruar se profesor Fehmi Agani ishte i urti i rrugëtimit të fuqishëm për liri e pavarësi.
Abdixhiku tha se vrasja e Aganit nga forcat serbe, ishte akt i hakmarrjes për triumfin historik të Kosovës.
“Politikani, sociologu, truri i lëvizjes për liri, pavarësi e demokraci, nënkryetari i Lidhjes Demokratike të Kosovës, dora e djathtë e Residentit Rugova, mbetet njëri ndër figurat më të mëdha kombëtare. Maturia, urtësia e thellësia e mendimeve të tij, janë shenja të secilit kujtim që sot kemi për të. Ai u vra 25 vite më parë, më 5 maj të vitit 1999. Vrasja e tij nga forcat ushtarake e policore serbe, ishte akt hakmarrjeje për triumfin tonë historik; Ishte vrasje e boshtit intelektual e ideologjik të vet Kosovës”, shkroi Abdixhiku.
Derisa, kreu i LDK-së tha se në këtë përvjetor ka kujtuar dhe nderuar profesorin Aganin.
“Në këtë përvjetor prej çerek shekulli, së bashku me struktura nga mërgata, nderuam dhe kujtuam profesor Aganin mu te këndi i tij, tani pjesë e pandashme e shtëpisë së madhe të demokracisë”, tha Abdixhiku./teve1.info/
