Kryetari i Lidhjes Demokratike të Kosovës (LDK), Lumir Abdixhiku, u deklarua pas takimit me presidenten Vjosa Osmani, duke theksuar se aktualisht nuk ekziston shumicë parlamentare dhe se vendi duhet të shkojë drejt zgjedhjeve të reja.
“Ne kishim një pikë të paraparë sipas Kushtetutës së Kosovës, për të diskutuar për caktimin e mandatit të ri për qeverinë e Kosovës. Në këtë takim u dëshmua ajo që LDK-ja ka thënë gjithmonë: sipas rezultateve të 9 shkurtit, nuk ka shumicë parlamentare. Në rrethana të tanishme, kjo është e qartë, dhe afatet kushtetuese na çojnë drejt zgjedhjeve të reja,” deklaroi Abdixhiku.
Ai shtoi se gjatë takimit është diskutuar edhe për qeverinë e unitetit dhe qeverinë e tranzicionit për të kaluar çështje urgjente, por një qeveri e tillë nuk është e mundur në situatën aktuale:
“Ironikisht, u përmend qeveria e unitetit dhe ajo e tranzicionit, por kjo është e pamundur tani. Sa më parë që shpallen zgjedhjet, aq më mirë për stabilitetin e vendit.”
Abdixhiku gjithashtu sqaroi se lideri i Lëvizjes Vetëvendosje, Albin Kurti, pati pretendime që duhet provuar edhe njëherë formimi i shumicës, por sipas tij shumica e përfaqësuesve të 52 deputetëve shqiptarë ishin të qartë:
“Flitej për unitet dhe për zgjidhje të krizës, për konceptin e kalimit të çështjeve që ne kishim paraqitur. U bë e qartë se nuk ka shumicë parlamentare, dhe tani i takon presidentes deri të mërkurën të përcaktojë nëse ka shumicë apo jo. Pati pretendime nga kryetari i VV-së se ndoshta duhet provuar edhe njëherë, por shumica ishin të qartë se nuk ka shumicë.”
