Kryetari i Lidhjes Demokratike të Kosovës, Lumir Abdixhiku, tha se kryeministri i vendit, Albin Kurti dhe presidentja, Vjosa Osmani, kanë dhënë qëndrime kontradiktore, në përmbajtjen e draft-statutit të Asociacionit.
Abdixhiku vlerësoi që Kosova do forcohej në tërësi si shtet, në qoftë se Kurti fillimisht do e prezantonte draft-statutin me partitë politike në Kosovë.
“Dy zyrtarët shtetëror, kryeministri dhe presidentja, që kanë pranuar dokumentin në gjithë përbërjen e tij, kanë dhënë dy qëndrime kontradiktore në përmbajtje të tij. Dokumenti i tillë do duhej të ndahej para se të pranohej. Pra, në momentin e parë që institucionet e Kosovës kanë pranuar propozimin, do duhej të kërkonin një koncenzus nacional, do të ishim më të fuqishëm si shumicë shqiptare, do të ishim më të fortë në tërësi si Kosovë”, deklaroi Abdixhiku para deputetëve.
Po ashtu, Abdixhiku tha se Kurti ka pranuar draft-statutin “në emër të popullit”. Megjithatë, shtoi që ende janë në terr informativ.
“Akti i pranimit të këtij dokumenti nga kryeministri i Kosovës, në prani të tri shteteve udhëheqëse kryesore evropiane dhe jo vetëm, ka natyrë të një zotimi ndërkombëtar që nis si zotim institucional i popullit të Kosovës. I shprehur përmes përfaqësuesve të tij, përkatësisht kryeministrit të vendit. Në emër të popullit të Kosovës, kryeministri i vendit, ka pranuar një dokument për herë të parë që definon statutin e Asociacionit, ne vazhdojmë të jemi në terr të plotë informativ”, shtoi tutje Abdixhiku në Kuvend.
Ky debat parlamentar po zhvillohet pas raportimit të Kurtit në Kuvend për takimin e fundit që kishte në Bruksel në kuadër të procesit të dialogut me Serbinë, më 26 tetor./teve1.info/.
