Kryetari i Lidhjes Demokratike të Kosovës, Lumir Abdixhiku pas takimit me presidenten, Vjosa Osmani ka deklaruar se nuk ka ndonjë zgjidhje eventuale për ngërçin politik.
Sipas Abdixhikut partitë politike kanë qëndruar kryesisht në pozicionet e tyre paraprake dhe nuk ka pasur as iniciativë për zhbllokim të gjendjes.
Abdixhiku ka shtuar se me aq sa ka parë në takim Lëvizja Vetëvendosje nuk ka as brengë dhe as urgjencë për ta ndryshuar situatën.
“Sot patëm një takim me Osmanin pas së cilit takim partitë kryesisht qëndruan në pozicionet e tyre paraprake që nënkupton se nuk ka ndonjë zgjidhje eventuale për ngërcin politik e nuk ka as iniciativ që do ta zhbllokoj këtë gjendje dhe është për keqardhje sepse gjendja e tanishme 16 herë përsëritje një muaj vonesë dhe më së paku iniciativë nga partia e parë që i ka 48 deputetë nënkupton se nuk ka as brengë e besa siç e pash në takim as urgjencë që kjo çështje të zgjidhet sa më parë”, ka thënë Abdixhiku.
Më tej, ai ka bërë të ditur se në këtë takim ka elaboruar idenë për qeverinë e unitetit për një periudhë të shkurtër kalimtare për të cilin ide ka thënë se përveç Vetëvendosjes reflektim pozitiv kishte nga të gjitha partitë.
“Në takim kam propozuar dhe elaboruar idenë për qeverinë e unitetit për një periudhë të shkurtër kalimtare, me pika të qarta. Jam i lumtur që kishte reflektim pozitiv nga partitë tjera në përmasën e konsiderimit, përjashto partinë e parë që nuk dha pozicion të qartë por as ide të tjera se si të dilet nga kjo gjendje”, është shprehur ai.
Abdixhiku ka theksuar gjithashtu se LDK-ja nuk është e interesuar të vazhdoj me seancat e çdo 48 orëve dhe ka kërkuar nga presidentja që sa më parë ta shqyrtoj dërgimin e kësaj çështjeje në Kushtetuese.
“Kryesia e LDK-së do të mblidhet sot. Nuk jemi të interesuar të vazhdojmë me cirkun e çdo 48 orëve të mbledhjes. Është mirë që sa më parë presidentja të shqyrtoj dërgimin e kësaj çështjeje në Gjykatën Kushtetuese në mënyrë që të zhbllokohemi nga kjo situatë”./teve1.info/
Përfundon takimi konsultativ mes liderëve politikë dhe presidentes Osmani
