Kryetari i Lidhjes Demokratike të Kosovës, Lumir Abdixhiku ka vizituar sot Komunën e Pejës, ku është pritur nga kryetari, Gazmend Muhaxheri.
Abdixhiku në Facebook ka shpërndarë fotografi nga qëndrimi i tij në këtë qytet, derisa tha se me Muhaxherin diskutuan fillimisht për punët e kryera deri më tani dhe ato të planifikuara në vijim.
“ Vizituam punimet e fundit në Çerdhen “Karagaç”, që po bëhej gati për plot 100 fëmijë. Një çerdhe moderne, me kushte e standarde që fëmijët e Pejës i meritojnë në plotni. Këtë model do ta replikojmë në secilin qytet tjetër në Kosovë. ‘Rruga e Re’ parasheh ndërtimin e 80 çerdheve të tilla për vetëm katër vjet.
Vizituam më pas dhe dy Qendra të reja, të Mjekësisë Familjare, njërën në Karagaç e tjetrën në Vitomericë. Sërish, modele të shkëlqyera për kujdes primar ndaj qytetarëve. Njëra zëvendësonte një objekt disadekadësh, tjetra ishte risi e banorëve në Karagaç. Të dyja zgjidhnin përfundimisht kapacitetet e kujdesit primar në Pejë. Do t’i përurojmë në ditë të pavarësisë.
Ndër shumë projekte të tjera infrastrukturore që po zhvillohen aktualisht në Pejë, vizituam rrugën turistike Vitomericë – Maja e Zezë; një mrekulli 6 kilometërshe mes bjeshkëve e pasurive të bukura të fala nga Zoti. Projekt kapital që le shenjë mbi gjenerata. Rrugë e re që çanë mes bjeshkëve për shtigje të pashkelura ndonjëherë”, tha i pari i LDK-së.
Derisa tha se kryetari Muhaxheri është punëtorë e prijës shembullor dhe se vetëm qeverisja e LDK-së arrin t’i shpërfaqë bukuritë e këtij qyteti me aq zotësi.
“E vërteta është se pak qytete kanë këso bukuri! E vetëm Gazi dhe qeverisja e LDK-së në Pejë arrin t’i shpërfaqë ato me kaq zotësi. Se Gaz Muhaxheri fiton bindshëm, kjo s’është rastësi. Është punëtor, e bashkëpunëtor i ndershëm, prijës shembullor. Se LDK ka kuadro të tilla, nga ai tek secili drejtor e këshilltar lokal, është thjeshtë bekim. Me ta, e të tillë gjithandej Kosovës, ‘Rrugën e Re’ do ta bëjmë realitet. Kosova ka nevojë për projekte të mëdha infrastrukturore, për çerdhe, shkolla, spitale e jo vetëm. Kosova, mbi të gjitha, ka nevojë për punë e zhvillim, si përgjigje ndaj popullizmit polarizues e depresionit kolektiv. E ardhmja është e bukur. Ne kemi gjetur Rrugën e Re. Tani kemi nevojë për secilin prej jush ta bëjmë atë realitet”, tha tutje Abdixhiku./teve1.info./
