Kryetari i Lidhjes Demokratike të Kosovës (LDK), Lumir Abdixhiku, ka përmbyllur fushatën zgjedhore në Prishtinë me një thirrje për dashuri dhe përkushtim ndaj kryeqytetit, duke theksuar se “Prishtina duhet, nuk lakmohet”.
Në tubimin përmbyllës të mbajtur të premten mbrëma, Abdixhiku tha se përkushtimi i LDK-së për Prishtinën nuk është vetëm premtim elektoral, por vazhdimësi e punës që tashmë shihet në terren.
“Ne e bëjmë këtë qytet sepse e duam. Sot Prishtina flet me vepra – me shkolla të rinovuara që kanë ndryshuar çdo mëngjes të fëmijëve tanë, me mësim tërëditor që ka lehtësuar jetën e çdo nëne, çdo prindi dhe çdo familjeje”, deklaroi Abdixhiku.
Ai shtoi se puna e deritanishme e LDK-së në Prishtinë është dëshmi e qasjes së përgjegjshme ndaj qytetit.
