Kryetari i Lidhjes Demokratike të Kosovës, Lumir Abdixhiku, ka reaguar pas deklarimeve të presidentes Vjosa Osmani, e cila të hënën kishte thënë se nuk mund të kërkojë më nga deputetët të mblidhen për çështjen e buxhetit të Komunës së Prishtinës dhe pagave të RTK-së.
Osmani kishte theksuar se ishte përpjekur të gjente zgjidhje, por sipas saj, partitë e ish-opozitës nuk pranuan të ktheheshin në Kuvend para nënshkrimit të dekretit për shpërndarjen e tij.
Abdixhiku ka bërë të ditur se gjatë mbrëmjes së nominimit të Glauk Konjufcës, i kishte shprehur gatishmërinë presidentes që të votohej një pako ligjore, e cila përfshinte zgjatjen e buxhetit për tre muaj, votimin e Ligjeve të Prishtinës dhe Gjilanit, sigurimin e pagave për RTK-në dhe miratimin e Pakos Evropiane të Rritjes.
Ai ka sqaruar se pas mandatimit të Konjufcës, Osmani e kishte kontaktuar për t’i thënë se kishte komunikuar me mandatarin dhe Lëvizjen Vetëvendosje, të cilët ishin shprehur pozitivë për këtë ide. Abdixhiku ka njoftuar gjithashtu kryetarët e PDK-së, AAK-së dhe Nismës, si dhe disa ambasadorë të QUINT-it, duke theksuar se nga ai moment nuk pati asnjë lëvizje për 15 ditë.
Abdixhiku ka shtuar se ky propozim, i hapur dhe i diskutuar prej tij, u kthye në tavolinën e caktimit të zgjedhjeve dhe se LDK-ja nuk ishte kurrë kundër, duke theksuar rëndësinë e korrektësisë dhe sjelljes njerëzore në betejën politike.
“Ani pse nuk kishte asnjë gatishmëri as për ta diskutuar bashkërisht në një vend këtë ide. Sot habitem se me sa lehtësi fshihet ky fakt dhe kjo e vërtetë. E kuptoj që jemi në betejë politike, por në këtë betejë na duhet të kemi minimalisht korrektësi dhe sjellje njerëzore. Kjo është e vërteta. Gjithsesi, pre të gjitha sfidat ka zgjidhje. Do ta shihni dhe në ditët në vijim se bllokada ishte e qëllimshme. Nuk është e re. Po zgjatë tash e 12 muaj. Se krejt kjo krizë është inskenim i një beteje të Don Kishotit me mullinj të erës. Kosova mund të bëhet lehtë. Është e jona. Do ta bëjmë”, ka shkruar ai.
