Kryetari i Lidhjes Demokratike të Kosovës (LDK), Lumir Abdixhiku, është përfshirë në debatin e hapur së fundmi pas deklaratës së deputetit të kësaj partie, Besian Mustafa, i cili tha se LDK ka gabuar rëndë kur ka votuar Hashim Thaçin për president të Kosovës.
Përmes një reagimi publik, Abdixhiku ka dalë në mbrojtje të Mustafës dhe të partisë, duke akuzuar kundërshtarët politikë për sulme të orkestruara dhe të paguara kundër LDK-së.
“Besiani është një politikan shembullor dhe LDK, bashkë me të, nuk kanë frikë nga zhurma e as nga sulmet e porositura”, ka shkruar Abdixhiku, duke shtuar se partia që ai drejton nuk matet me tituj portalesh dhe opinione që, sipas tij, prodhohen nga interesa të ngushta politike.
Kreu i LDK-së theksoi se sulmet ndaj partisë së tij janë rezultat i unitetit të brendshëm, i cili, sipas tij, po i nervozon kundërshtarët politikë pasi u pamundëson pazaret dhe pushtetet e lehta.
Ai gjithashtu nënvizoi se LDK ka anëtarësi të fortë dhe besnike, e cila e ka mbështetur partinë edhe në periudha të vështira, duke theksuar se kjo është arsyeja pse, sipas tij, përpjekjet për ta dëmtuar partinë po dështojnë.
“Nuk do të përgjigjemi me mllef, por me punë, program dhe besim te shteti dhe qytetari”, ka theksuar Abdixhiku, duke shtuar se LDK do të vazhdojë rrugën e saj me njerëz që përfaqësojnë të ardhmen e vendit.
Në fund, Abdixhiku ka bërë thirrje për ballafaqim të hapur me ata që, sipas tij, po sulmojnë LDK-në përmes mjeteve financiare dhe propagandës, duke e cilësuar këtë si pjesë të përpjekjeve për ta dëmtuar një parti që, sipas tij, po qëndron e bashkuar dhe e fortë.
