Kryetari i Lidhjes Demokratike të Kosovës, (LDK), Lumir Abdixhiku e ka mbështetur vendimin e Komunës së Prishtinës për ndalimin e përdorimit të Doracakëve ‘Edukatë Seksuale dhe Shëndeti riprodhues’ në shkollat e Prishtinës.
Abdixhiku nëpërmjet një postimi në Facebook ka kërkuar që një veprim i tillë të ndërmerret nga të gjitha komunat e Kosovës.
“Mbështes, vendimin e Jehonës dhe të Kryeqytetit në ndalimin e përdorimit të Doracakëve ‘Edukatë Seksuale dhe Shëndeti riprodhues’ 1-5, 6-9 dhe 10-12 në shkollat e Prishtinës. Të gjitha komunat e Kosovës të marrin hapa të ngjashëm dhe të ndalojnë përdorimin e këtyre materialeve në shkollat e tyre, dhe kështu të mbrojnë fëmijët tanë nga eksperimentet e pushtetit. Me LDK-në, pas 9 shkurtit, do ta kthejmë dinjitetin e mësimdhënësve dhe vet institucionit arsimor. Shkollat do të jenë një vend ku fëmijët tanë do të jenë të sigurtë, të dijshëm e të zhvilluar”, ka shkruar ai.
Ndryshe, të enjten drejtoresha e Arsimit në Komunën e Prishtinës, Jehona Lushaku- Sadriu, ka njoftuar se ka marrë vendim për të ndaluar përdorimin e doracakëve “Edukimi Seksual dhe Shëndeti Riprodhues”, për klasat nga 1-12 në të gjitha shkollat e Prishtinës./teve1.info/
Lushaku -Sadriu ua ndalon shkollave në Prishtinë përdorimin e doracakëve për “Edukimin Seksual”
