Kryetari i LDK-së, Lumir Abdixhiku ka pritur sot në takim ambasadorin e ri të Shqipërisë në Kosovë, Petrit Malaj.
Bëhet e ditur se pjesë e diskutimit kanë qenë zhvillimet e fundit në Kosovë e Shqipëri, si dhe tema të tjera në interes të të dyja vendeve.
Në një postim në Facebook, nga LDK-ja njoftojnë se gjatë takimit, Abdixhiku ka riktheksuar se “thellimi i marrëdhënieve vllazërore ndërmjet Kosovës dhe Shqipërisë është i domosdoshëm”.
“Kryetari Abdixhiku uroi ambasadorin Malaj si dhe gjithë shqiptarët për festën e 28 Nëntorit, duke konfirmuar rolin e përbashkët si dy shtete në stabilitetin dhe paqen rajonale dhe globale. Shqipëria ka bërë hapa të jashtëzakonshëm në zhvillimin e saj si shtet sidomos viteve të fundit, në aspektin ekonomik, të sigurisë dhe përshpejtimin e reformave drejt integrimit të plotë në familjen evropiane prandaj dhe mbetet partneri krucial në avancimin e agjendës integruese evropiane të Ballkanit Perëndimor”, thuhet në njoftim. /Teve1.info/