Kryetari i Lidhjes Demokratike të Kosovës, Lumir Abdixhiku, ka kujtuar 34-vjetorin e themelimit të kësaj partie.
Derisa ka përmendur edhe ish-presidentin, Ibrahim Rugova, Abdixhiku tha se LDK-ja ishte lindje e aspiratave të artikuluara politike të popullit të Kosovës për liri, pavarësi, demokraci e jetë të lirë.
“Një muaj pas rënies së Murit të Berlinit, saktësisht më 23 dhjetor të vitit 1989, intelektual të shquar të kohës, kishin nisur rrënimin e murit të shtypjes shekullore ndaj popullit të Kosovës. Si përgjigje ndaj thirrjes monumentale të historisë, këta themeltarë të orëve të rënda, kishin krijuar lëvizjen më të madhe e më domethënëse historike të shqiptarëve të Kosovës, kishin krijuar Lidhjen Demokratike të Kosovës. Në krye të kësaj besëlidhje e kësaj lëvizje popullore, qëndronte prijësi ynë historik, ati themeltar i shtetit të Kosovës, Presidenti historik, Dr. Ibrahim Rugova”, ka shkruar Abdixhiku në Facebook.
Më tej, Abdixhiku u ka bërë thirrje të gjithë anëtarëve të LDK-së, të angazhohen tutje në rrugëtimin e partisë.
“Sot, në këtë 34 vjetor, uroj dhe ftoj secilin anëtar të Lidhjes Demokratike të Kosovës, secilin të djathtë, patritot e rugovist, të angazhohet në rrugëtimin tonë të ri historik; fitoren e madhe të dekadës së katërt, që përmbushë ëndrrën tonë politike të ditëve të para: Kosova një shtet i lirë, i pavarur e sovran, i integruar në Bashkimin Evropian dhe në NATO dhe me miqësi të përhershme me Shtetet e Bashkuara të Amerikës”, thuhet më tej.
Po ashtu, ai ka shkruar se aktivitetin sot e kanë nisur tek varri i themeltarit, për të vazhduar me Forumin e Rinisë tek Muzeu, “Shtëpia e Pavarësisë Dr. Ibrahim Rugova”.
“Zoti e bekoftë Kosovën. Zoti e bekoftë Lidhjen Demokratike të Kosovës. Urime dita e themelimit!”, ka përfunduar Abdixhiku./teve1.info/.
