Kryetari i Lidhjes Demokratike të Kosovës, Lumir Abdixhiku ka thënë se kjo parti ishte lindje e aspiratave për liri, pavarësi e demokraci.
Në shënimin e 35-vjetorit të kësaj partie ai tha se një grup vizionarësh guxuan të ëndërronin për një të ardhme tjetër të Kosovës.
“Në krye të kësaj besëlidhje e kësaj lëvizje popullore, qëndronte prijësi ynë historik, Ati Themeltar i shtetit të Kosovës, Presidenti historik, Dr. Ibrahim Rugova. Lindja e LDK-së, ishte lindje e aspiratave të artikuluara politike për liri, për pavarësi, për demokraci. Ishte lindje e përpjekjes sonë kolektive për jetë të lirë, të dinjitetshme, të pavarur, në shtetin e Republikës së Kosovës”, ka shkruar Abdixhiku.
Abdixhiku ka thënë se kjo parti edhe sot gjendet sërish mes thirrjeve të mëdha të popullit të Kosovës.
“Lidhja jonë 35 vjeçare, gjendet sot sërish mes thirrjeve të mëdha të popullit të Kosovës për ndryshim. Këto thirrje ekojnë nëpër takimet e tubimet tona mbarëkombëtare, nga sallat e stërmbushura, deri tek takimet familjare. Janë thirrje për ndryshim të madh politik, që vendit tonë i sjellë trajektorën origjinale për integrim euroatlantik, zhvillimin e shumëpritur ekonomik, e mbi të gjitha, rugovizmin si vlerë, si sjellje, si projeksion shtetar brenda dhe jashtë pa dallim”.
