Kreu i LDK-së, Lumir Abdixhiku, tha se vlera e koeficientit prej 105 eurove është goditje për mjekët, mësuesit, policët, ushtarët e shërbyesit civil, raporton teve1.info
Parmes një statusi në Facebook, Abdixhiku ka shkruar se në krizën më të madhe ekonomike e sociale, Qeveria tregoi pandjeshmëri ndaj qytetarëve.
“Në krizën më të madhe ekonomike e sociale ndër vite, Qeveria sërish tregoj pandjeshmëri. Pandjeshmëri ndaj përballjes qytetare, ndaj rritjes së kostos së jetesës, ndaj vet njerëzve të këtij vendi.
Koeficienti në vlerë prej vetëm 105 është goditje e radhës ndaj mjekëve, mësuesve, policëve, ushtarëve e gjithë shërbyesve publik. Është braktisje e njerëzve të vendit; që shkakton braktisjen e tyre të vendit”, ka shkruar ndër të tjera Abdixhiku.
Sipas tij, LDK-ja ka propozuar koeficient në vlerë prej 125, derisa ka shtuar se çdo vlerë më e ulët është zbritje e pagës.
“Gjithçka më pak se aq është ulje e pagave për disa e mosrritje për të tjerët. Është injorim i inflacionit e kushteve të rënduara të jetesës. Këtë propozim do të dërgojmë menjëherë edhe si amandament në Kuvend. Një qeveri të shpërputhur nga realiteti, vendi ynë nuk e meriton. Kosova meriton më mirë, Kosova mundet më shumë!”, ka shkruar Abdixhiku.
