Kryetari i Lidhjes Demokratike të Kosovës, Lumir Abdixhiku, ka reaguar ndaj deklaratës së ministrit të Brendshëm, Xhelal Sveçla, i cili ka shkruar se Beogradi po tenton që të bëjë luftë hibride në Kosovë.
Abdixhiku ka thënë se deklarata e Sveçlës ku etiketohen edhe gazetarët është e pamatur, nxitëse dhe ofenduese.
“Deklaratë e pamatur, nxitëse e ofenduese e Ministrit të Punëve të Brendshme. Etiketimi i pabazë i gazetarëve e ofendimi i turpshëm i luftëtarëve – edhe nëse s’pajtohemi me ta – është nivel i ri i ulët i politikëbërjes në Republikë. Të injorosh komunikimin e shefes së partisë me një terrorist, e të ndërtosh gjuhë nxitëse e përplasëse me plot imagjinatë është maskaradë”, ka shkruar Abdixhiku në Facebook.
Sipas Abdixhikut, gjuha e përdorur nga Sveçla, kërkon përplasje, dhunë e krizë.
“Duket se mendja e pushtetit është mu në dhunë e krizë. Sot, megjithatë na duhet maturi. Na duhen mendje të urta, që afrojnë e s’ndajnë. Sot, mbi të gjitha na duhen politikanë që distancohen nga një mendësi primitive e tillë. E mendësia e tillë meriton veçse shkarkim. Asgjë më pak”, thuhet tutje në postimin e Abdixhikut.
Më tej, kreu u LDK-së ka vlerësuar që Kosova duhet ta bëjë një rrugë të mirë.
“Kosova meriton më mirë. Kjo gjuhë, dhuna e nxitja e saj, nuk kanë vend”, ka përfunduar Abdixhiku./teve1.info/.
