Anëtarët e kryesisë së Lidhjes Demokratike të Kosovës u bën bashkë mesditën e së martës tek selia e partisë.
Kryetemë në tavolinë ishte thirrja e kryetarit të Lëvizjes Vetëvendosje për koalicion qeverisës.
Kësaj ftese Lidhja Demokratike e Kosovës i ka thënë“jo”.
Por, kryetari i LDK-së, Lumir Abdixhiku, në konferencë për medie para gazetarëve të martën ka paraqitur një propozim tjetër.
Ai ka propozuar një qeveri të tranzicionit me të gjitha partitë deri në kohën e presidentit.
“Propozojmë nisjen e një procesi të ri politik. Në përputhshmëri me këtë, LDK-ja propozon nisjen e këtij procesi me të gjitha partitë për nisjen e një qeverie nacionale të tranzicionit”, tha kreu i LDK-së.
Abdixhiku i ftoi të gjithë liderët për t’u takuar edhe për t’i filluar diskutimet për krijim e një qeverie të tranzicionit.
“Për këtë si kryetar i LDK-së jam i gatshëm të takohem me të gjitha partitë politike shqiptare, të ndihmoj në këtë proces dhe e ftoj edhe zotëri Kurtin siç i ftoj edhe liderët politikë, të cilët i kam njoftuar tashmë për këtë iniciativë kurdo që ata e shohin të arsyeshme”, u shpreh ai.
Sipas Abdixhikut, kryetari i Aleancës për Ardhmërinë e Kosovës, Ramush Haradinaj, tashmë i ka thënë po propozimit.
Në anën tjetër ka pasur reagime edhe nga partia fituese e zgjedhjeve Lëvizja Vetëvendosje.
Në një postim në rrjetin social facebook, Blerim Sallahu, ka deklaruar se është jokushtetuese që të propozohet një qeveri tranzicionale nga një parti që doli e treta në zgjedhjet e fundit parlamentare.
