Kryetari i Lidhjes Demokratike të Kosovës, Lumir Abdixhiku ka akuzuar për shkelje të Kushtetutës pesë ministra të Qeverisë Kurti.
Albulena Haxhiu, ministre e Drejtësisë, Arbërie Nagavci ministre e Arsimit, Xhelal Sveçla ministër i Punëve të Brendshme, Rozeta Hajdari ministre e Industrisë dhe Hekuran Murati ministër i Financave, sipas Abdixhikut kanë bërë shkelje të Kushtetutës.
Ai në 15-vjetorin e ratifikimit të Kushtetutës së Kosovës, ka thënë se shkeljet e tyre janë të konfirmuara dhe se pritet të ketë edhe ministra tjerë që kanë bërë këtë gjë.
“Në Ditën e Kushtetutës, le t’i kujtojmë shkelësit e saj. Ata të konfirmuar tashmë, e të tjerët në pritje. Do të thonë se janë shkelje të lehta këto; se Kushtetuta është shkelë dhe nga të tjerët më parë. Por a është ky ndryshimi për të cilin Kosova kishte e ka aq shumë nevojë? Që pushtetarët e paprekshëm, të qëndrojnë mbi ligj e mbi Kushtetutë”, ka shkruar ai në Facebook.
