Dy liderë të shteteve të Ballkanit Perëndimor, Dritan Abazoviq kryeministër në detyrë i Malit të Zi dhe Edi Rama, kryeministër i Shqipërisë, nga Podgorica i kanë dërguar mesazh kryeministrit të Kosovës, Albin Kurti dhe presidentit të Serbisë, Aleksandër Vuçiq, që të vazhdojnë me dialogun për normalizim të raportëve.
Ata në një konferencë për media pas mbledhjes së dy qeverive , kanë vlerësuar planin franko-gjerman, megjithatë kanë thënë se u takon liderëve të Kosovës dhe Serbisë të vendosin.
Kryeministri në detyrë i Malit të Zi, Dritan Abazaoviq, ka thënë se mbështesin dialogun dhe se vlerësojnë se plani franko-gjerman është i mirë.
Ai ka thënë se bashkëpunimi është rruga e vetme drejt BE-së në Ballkanin Perëndimor, duke thënë se nuk përkrahin politikat e viteve të 90-ta.
“Qeveria e Malit të Zi e përkrahë maksimalisht dialogun Kosovë –Serbi dhe mendojmë se plani franko-gjerman është një planë i mirë se duhet me pas normalizim në rajon. Normalisht ne nuk mund të themi se kush dhe si ka me vepru politikisht. Na mbështesim dialogun marrëveshjen dhe të ardhmen evropiane të Ballkanit Perëndimor”, ka thënë Abazoviq.
Ndërsa, kryeministri i Shqipërisë, Edi Rama, ka thënë se janë në përkrahje të Qeverisë së Kosovës, duke thënë se nga zemra i uron sukses në këtë proces.
Ai ka thënë se shpreson dhe po angazhohet që procesi i dialogut të hyjë në një rrugë të duhur.
“Plani franko-gjerman me sa e njoh është mundësia më e mira që ka qenë ndonjëherë në tavolinë. Unë respektoj sovranitetit e dy palëve për të marrë vendimin. Shqipëria në këtë rast është në krahë të Kosovës të cilës i urojë me gjithë zemër sukses”, ka thënë Rama.
Kurti e Vuçiq do të takohet sot në Bruksel në ndërmjetësimin e zyrtarëve të BE-së për të diskutuar këtë plan./teve1.info/
