Deputeti, Haki Abazi vlerësoi që nuk ka më diasporë e cila e ka vullnetin e njëjtë për të shpenzuar fonde në Kosovë, ashtu siç ka ndodhur në vitet paraprake.
Duke folur për pasojat që mund t’i bartë Kosova pas tensionimit të situatës në veri të vendit, Abazi tha se efekti i përbashkët financiar do të jetë 5-vjeçar, shkruan teve1.info.
“Nuk ka investitorë seriozë, nuk ka diasporë e cila e ka vullnetin e njëjtë për të shpenzuar fonde në Kosovë, ashtu siç ka ndodhur viteve të kaluara, kjo do vazhdojë nëse ne e lejojmë Serbinë të na krijojë tensione brenda. Efekti i përbashkët financiar do të jetë 5-vjeçar, efekt i pakove financiare të Bashkimit Evropian dhe efekt i rikuperimit të marrëdhënieve”, deklaroi Abazi në emisionin “Këndi i Debatit”.
Madje sipas tij, NATO-ja dhe Bashkimi Evropian, nuk do ta shohin më Kosovën me të njëjtin sy të seriozitetit nëse bëhen manovrime politike për qëllim të votave.
“Do të thotë kemi kosto financiare, kemi kosto afatgjate politike në politikat e integrimit”, shtoi tutje Abazi në Tëvë1.
Kujtojmë që tensionet e ditëve të fundit në veri të Kosovës po shtojnë rreziqet për ekonominë e vendit. Shqetësimet e para kanë ardhur nga komuniteti i biznesit dhe investitorët e huaj që paralajmërojnë të largohen për shkak të pasigurive të larta./teve1.info/.
