Përmes një postimi në Facebook, Abazi ka thënë se nuk do të protestojë në organizimet e thirrura nga organizata të ndryshme, duke thënë se dëshiron të shohë veprim e përgjegjësi, raporton teve1.info
“A ndryshohet gjendja dhe a shërohet mendja me konferenca nëpër hotele, me organizata joqeveritare qyqare që jetojnë për të marrë një pagë e nuk kanë guximin as dije e as kurajo me ngrit zërin e me kërku veprim e ndryshim. A bëhet ndryshimi me festa ku zyrtarët kalojnë orë të tëra në gosti dhe jo në vende pune?!”, ka shkruar Abazi.
Tutje ai theksoi se nuk ka alarm më të madh se kjo vrasje në shoqërinë tonë, sipas tij ky alarm po bie çdo ditë në vendin tonë teksa shtoi se zyrtarit “tymi nuk po i prishet”.
“Nuk ka alarm më të madh se ky për shoqërinë tonë, ky alarm po bie çdo ditë dhe gjithandej, e zyrtarit tymi nuk po i prishet. Sot nuk dal me protestu sepse sot dua të shoh dorëheqje dhe arrestim të përgjegjësve që me injorancën, me mungesën e respektit për punën, shtetin, ligjin, jetën e njeriut, kanë mundësuar që krimineli të merrë jetë, të vras një grua, një foshnje dhe të nxijë shumë jetë të tjera”, ka shkruar deputeti i VV-së.
Ndryshe, vrasja e gruas 35-vjeçe shtatzënë, dyshohet se ndodhi dje pranë klinikës së Gjinkelogjisë në Prishtinë rreth orës 18:00.
Dorasi ndodhet ende në arrati, ndërsa i njëjti është emër i njohur për organet e rendit.
E ndjera kishte urdhër-mbrojtjeje për 6 muaj, e i dyshuari kishte aktakuzë për kanosje.
Policia kërkon ndihmë për arrestimin e Sokol Halilit./teve1.info
