Aleanca për Ardhmërinë e Kosovës (AAK), ka akuzuar kryeministrin e Kosovës, Albin Kurti për përfshirje direkte në përzgjedhjen e bordeve të Kompanive Rajonale të Ujësjellësit (KRU).
Sipas AAK-së, Kurti ka organizuar takime me kandidatët në zyrën e tij para se këto përzgjedhje të formalizoheshin me vendime nga Qeveria.
“Një nga faktorët kryesorë që ka ndikuar në këtë situatë është roli i qeverisë, veçanërisht i Kryeministrit Albin Kurti. Pavarësisht premtimeve të përsëritura për përmirësimin e gjendjes në sektorin e ujit përmes instalimit të bordeve profesionale, këto premtime nuk janë materializuar sipas pritshmërive. Në të vërtetë, përzgjedhja e kryesuesve dhe anëtarëve të bordeve shpesh është bërë pa ndjekur një proces transparent dhe të bazuar në merita profesionale. Është e rëndësishme të theksohet se Kryeministri Kurti është dalluar nga paraardhësit e tij duke ndërmarrë një rol direkt në përzgjedhjen e anëtarëve të bordeve. Ai ka organizuar takime me kandidatët në zyrën e tij para se këto përzgjedhje të formalizoheshin me vendime nga Qeveria. Edhe pse kjo qasje mund të konsiderohet si një përpjekje për të marrë kontroll më të madh mbi procesin, rezultati ka qenë zhgënjyes. Në vend që të sjellë një standard më të lartë profesionalizmi, procesi ka pasur prirje të prodhojë të njëjtat rezultate si më parë, duke lejuar emërime të bazuara më shumë në lidhjet personale dhe politike sesa në aftësitë dhe ekspertizën”, thuhet në postimin e AAK-së në Facebook.
Më tej thuhet se përmirësimi i situatës kërkon një reformë të thellë në mënyrën se si përzgjidhen dhe funksionojnë bordet.
“Kjo mënyrë e menaxhimit ka krijuar jo vetëm një hendek midis politikës dhe profesionalizmit, por edhe një mungesë besimi midis qytetarëve dhe institucioneve publike. Përmirësimi i situatës kërkon një reformë të thellë në mënyrën se si përzgjidhen dhe funksionojnë bordet. Është e domosdoshme që proceset të jenë të hapura dhe transparente, duke garantuar që përzgjedhja e anëtarëve të bordeve të bëhet në bazë të kualifikimeve, përvojës dhe integritetit të tyre”, theksohet tutje./teve1.info/
