Grupi Parlamentar i Aleancës për Ardhmërinë e Kosovës, kërkon që të enjten në Kuvendin e Kosovës, të mbahet debat parlamentar për gjendjen në shëndetësi.
Kështu bëri të ditur, deputeti i kësaj partie, Shemsedin Dreshaj, derisa tha që Kosova vazhdon të mbesë vendi i vetëm në rajon pa sigurime shëndetësore, duke shtuar se me thirrjen e këtij debati parlamentar, presin mbështetje nga pozita dhe opozita.
“Aleanca për Ardhmërinë e Kosovës si grup parlamentar, ka filluar një nismë, me të cilën shpresojmë që të enjten do të bëhet një debat parlamentar lidhur me gjendjen në shëndetësi, problemet e përditshme për të cilat po hasim në shëndetësi dhe mungesën e sigurimeve shëndetësore. Kosova vazhdon të jetë vendi i vetëm në rajon e Evropë pa sigurime të mirëfillta shëndetësore dhe vazhdojnë problemet e njëjta përkundër dyfishimit të buxhetit në shëndetësi. Ne e kemi ftuar këtë debat parlamentar, ku feedback-un e saj, e përmbyllim me një rezolutë, që shpresojmë do të mbështetet edhe nga pozita e opozita”, deklaroi Dreshaj në një konferencë të thirrur për media.
Më tej, deputeti i AAK-së, tha se plaga e vjetër e shëndetësisë kosovare, vazhdon të jetë edhe më tutje./teve1.info/.