Zëdhënësi i Aleancës për Ardhmërinë e Kosovës (AAK), Kushtrim Xhemaili, thotë se partia e tij nuk e ka ndihmuar kryeministrin Albin Kurti të vijnë në pushtet, “e as nuk e ndihmon për të qëndruar në pushtet”.
Xhemaili ka dhënë kritika ndaj dy partive opozitare, PDK e LDK për mospërkrahje ndaj mocionit të paralajmëruar kundër Qeverisë nga AAK-ja.
Xhemaili ka thënë se është momenti i fundit që partitë tjera opozitare të tregojnë se si e mendojnë “ta çojnë Kurtin në shtëpi”, pasi që sipas tij, nuk i kanë dhënë përkrahje mocionit të AAK-së.
“Përderisa partitë e tjera opozitare pajtohen që qeverisja Kurti është e dëmshme për vendin dhe se Kurti duhet sa më parë të shkojë në shtëpi, njëkohësisht hezitojnë ta mbështesin mocionin e mosbesimit të Aleancës. Ky është nje tregues serioz i pavendosmërisë për të ruajtur vendin nga rreziqet e qe i sjell qeverisja. Prandaj tani është momenti që të tregojnë se si e mendojnë ata ta çojnë Kurtin në shtëpi nëse jo përmes mocionit! Apo vërtetë presin që të ndodh ndonjë mrekulli vetvetiu?”, ka shkruar ai në Facebook.
Ai ka pyetur se “ata që e njohin Kushtetutën”, le të tregojnë si shkarkohet Qeveria nëse jo me mocion.
“Sa për t’i rikujtuar gjithë atyre që akuzojnë se Aleanca paska ndihmuar ardhjen e Kurtit në pushtet, kjo le te mbetet ne ndërgjegjen e secilit. As se kemi ndihmuar as nuk e mbajmë në pushtet. Mos rreshtimi pas nismës për mocion mosbesimi ndaj kësaj qeverie, mund të jetë zgjatje e agonisë në vend, me ose pa vetëdije. Ju që dini me e lexu Kushtetutën a po na tregoni si shkarkohet qeveria, nëse jo me mocion?”, ka shkruar ai tutje.
Ndërsa, kritika ndaj dy këtyre partive opozitare i ka dhënë edhe anëtari i Partisë Socialdemokrate të Kosovës, Asdren Shala, të cilat i ka quajtur frikacake.
Ai thotë se edhe deklarimet për shkuarje në zgjedhje i kanë sa për “të thënë diçka”, pasi sipas tij, ata nuk duan e as nuk kanë guxim për shkuarje në zgjedhje.
Shala në emisionin “Ditari” në Tëvë1, ka thënë se këtë janë kanë thënë edhe anëtarë të PDK-së e LDK-së.
“Kam shokë edhe në paritë opozitare dhe rri më ta. Në biseda private a ta e dinë. Mu tekstualisht ma kanë thënë të PDK-së e LDK-së se këta e kemi vetëm deklarim për media, se me shku në zgjedhje na ha dreqi. Pra këto janë veç deklarime për konsum publik. As nuk duan e as nuk guxojnë me shku në zgjedhje”, ka thënë Shala.
Sipas tij, partitë opozitare e kanë pasur në dorë ta ndalin këtë gjendje që e ka pruar Qeveria Kurti, por ai ka thënë se ata kanë frikë.
“Nga njëra anë thua që Kosovës po i rrezikohet siguria nacionale nga veprimet e Kurtit, nga ana tjetër sillesh në mënyrë paqësore sikur nuk po ndodhë asgjë, pra aktivitetin e tij e reduktojnë në çështje të deklaratave nga foltorja e Kuvendit, ti ose nuk je i sinqertë me qytetarin ose je tuc, unë mendojë se këta (opozita) po tutën”, ka thënë Shala./teve1.info/
Shala: Nga PDK e LDK më kanë thënë se “me shku në zgjedhje na ha dreqi”
