Aleanca për Ardhmërinë e Kosovës i ka reaguar ministres së Drejtësisë, Albulena Haxhiut në lidhje me deklaratën e saj për Ramush Haradinaj.
Në reagim thuhet se veç Kosova e ka një ministre të drejtësisë që i fut hundët gjithkund.
Sipas tyre, Haxhiu sa ishte në opozitë, ka qenë sinonim i personit që ka shkelur ligjet e vendit e s’ka lënë gjyqtar apo prokuror pa e sulmuar.
“Veç Kosova e ka një ministre të drejtësisë që i fut hundët gjithkund. Nuk ka vend tjetër ku ministri i drejtësisë e sulmon systemin gjyqësor të shtetit të vet. Ajo, sa ishte në opozitë, ka qenë sinonim i personit që ka shkelur ligjet e vendit e s’ka lënë gjyqtar apo prokuror pa e sulmuar. Dhe prandaj është emëruar ministre e drejtësisë që misionin e partisë së vet e që është shkatërrimi i sistemit të drejtësisë, ta çojë deri në fund”, thuhet në reagimin e AAK-së.
Sipas tyre ka shumë përgjigje që duhet të japë kjo ministre, përpara se të merret me propagandë të nivelit të ulët.
“Sa merret me kopalla, ajo është mirë të japë përgjigje se çka ndodhi me rastin Dehari, si u zhdukën e si u gjetën mostrat, çka ndodhi me gjuajtjen e Kuvendit me zollë nga bashkëpartiakët e saj, si u përfshinë matrapazët ordinerë në aferën e vjedhjes së miellit e vajit. Le të merret me Martin Berishaj e Nagip Krasniqin e të mos i marrë në mbrojtje. Më në fund ajo duhet t’i tregojë popullit të Kosovës, se pse Kryetari i Partisë së saj, sot Kryeministër, nuk i përgjigjet ftesës së Prokurorisë për t’u intervistuar, por e sfidon drejtësinë e Shtetit. Ka shumë përgjigje që duhet të japë kjo ministre, përpara se të merret me propagandë të nivelit të ulët” vazhdon reagimi i Aleancës për Ardhmërinë e Kosovës.
Sipas tyre, Ramush Haradinaj ka qenë dhe mbetet hero e luftëtar kundër Serbisë e për lirinë e vendit të vet, të cilin siç thotë AAK, sot e poshtërojnë njerëz si kjo minstre.
“Përpara se të shpifë për lidhjet e Ramush Haradinajt me Serbinë, le të merret me lidhjet e shefit të vet e me të shkuarën e tij, për të cilën kanë dalë edhe informata e që përflitet gjithandej”, shkruan AAK.
Haxhiu: Prokuroria nuk e fton Ramush Haradinajn për shkak të lidhjeve të tij me Serbinë
