Kryeministri i Kosovës, Albin Kurti tha se nuk ishte i pari që ka kërkuar intervistim në zyre të kryeministrit. Tëvë1 mëson se para tij një kërkesë të tillë e ka bërë Ramush Haradinaj sa ishte kryeministër. Ai dëshmoi para prokurorit special Valdet Gashi, të cilin e kontaktoi televizioni por nuk dha përgjigje. Nga AAK-ja thonë se Haradinaj gjithmonë ka respektuar normën ligjore, e njohësit e ligjit ia kujtojnë Kurtit që erdhi në pushtet për të qenë ndryshe e jo njëjtë sikur AAK-ja.
Ka gati dy javë që ka ftuar prokurorët në zyrën e tij për ta intervistuar në rolin e dëshmitarit.
Por shefi i Qeverisë së Kosovës, Albin Kurti tha se nuk është i pari që e ka bërë këtë veprim.
Kryeministri që dha dëshmi në objektin e Qeverisë së Kosovës, sipas burimeve të televizionit është Ramush Haradinaj.
Ai këtë dëshmi e dha para prokurorit special, Valdet Gashi, për rastin e 53 milionëshit.
Valdet Gashi është i njëjti prokuror që ia dërgoi ftesën për dëshmi edhe Kurtit.
Për dy ditë, Tëvë1 ka pritur përgjigje nga Gashi se pse ka shkuar në zyrën e Haradinaj dhe çfarë rrethana kanë qenë që Haradinaj nuk është paraqitur në Prokurori mirëpo i njëjti nuk ka kthyer përgjigje.
E nga Aleanca per Ardhmërinë e Kosovës, thone qe Haradinaj ka respektuar gjithmonë normën ligjore.
Deputeti Shemsedin Dreshaj ka mohuar që kryetari i partisë së tij është intervistuar në zyrë.
Mirëpo për avokatin Yll Zekaj edhe nëse kjo praktikë ka ekzistuar, të njëjtin shembull nuk duhet të ndjek Kurti i cili ka ardhur në pushtet për ndryshime.
Zekaj thotë se kryeministri Kurti duhet të jetë model dhe jo t’i bënte këto veprime për një grusht votash.
