Grip i shpezëve që u shfaqë ditë më parë në Shqipëri, bëri që rreziku të ndihet edhe në Kosovë.
Ani pse Kosova nuk importon shpezë të gjalla të gjitha masat për këtë sëmundje i ka ndërmarrë.
Se çfarë është bërë në këtë drejtim e tregoi për televizionin, Lamir Thaçi, zëdhënës në Agjencinë e Ushqimit dhe Veterinarisë.
“Ky është grip që përhapet përmes shpendëve shtegtare dhe sigurisht që përderisa është afër territorit të Kosovës rreziku ekziston. Ne kemi marrë masat paraprake preventive ato të masave kufizuese për zonën e Durrësit dhe ngarkesat që vijnë nga kjo zonë e po ashtu jemi në kontakt të vazhdueshëm. njoftimin e kemi dhënë edhe për fermerët sidomos ata komercial që menjëherë të i aktivizojnë masat e bio sigurisë në fermat e tyre, që ti aktivizojnë masat vet mbrojtëse për parandalim të përhapjes së gripit në vendin tonë”, ka thënë Thaçi.
Sipas tij nga ky grip, dëmtohet ekonomia e fermerëve dhe ajo shtetërore.
“Është sëmundje e karakterit ekonomik që i dëmton ekonomitë e fermerëve dhe ekonominë shtetërore për shkak se ne duhet të intervenojmë në secilin rast që rezulton pozitiv duke ndërmarr masa kufizuese të asgjësimit të shpezëve edhe njëkohësisht vendosjes në karantinë të zonës e cila shpërthen”, thotë Thaçi.
Safet Gerxhaliu, ish-kryetari i Odës Ekonomike të Bizneseve, tha se në rastet e shpërthimeve të gripave të tilla në të kaluarën janë kompensuar fermerët.
“Është e vërtetë që në të kaluarën ka pasur raste të tilla ku kemi pasur dëme qoftë të lopëve, qoftë të gjedhëve, qoftë të deleve por edhe forma të tjera. Mirëpo definitivshtë shteti ka qenë përkundër vështirësive burokratike në masë të caktuar solidar apo i ka ndihmuar komunitetit biznesit”, vlerëson Gërxhaliu.
Madje sipas këtij të fundit nuk duhet të kontrollohet vetëm importi i produkteve të gatshme por duhet të ketë kujdes edhe në ushqimin që shfrytëzohet për ushqimin e shtazëve apo shpezëve në Kosovë.
