Kryetari i Lidhjes Demokratike të Kosovës, Lumir Abdixhiku ka konfirmuar se Sokol Haliti do të kandidojë edhe për një mandat tjetër për kryetar të Komunës së Vitisë.
Ndërkaq, të mërkurën në emisionin “Ditari” në Tëvë1, Haliti ka treguar nëse pret që sërish ta marr udhëheqësinë e kësaj komune në zgjedhjet lokale të 12 tetorit.
“E imja është me e realizuar deri ditën e fundit programin qeverisës katërvjeçar për të cilin jam zotuar para qytetarëve, ndërsa e qytetarëve është ta zgjedhin kryetarin e tyre të cilit i besojnë për katër vitet e ardhshme. Unë e kam realizuar planin 100% dhe jam duke e tejkaluar, ndërsa iu jam afruar qytetarëve si kërkesë dhe nevojë qytetare jo vetëm anëtarësisë së LDK-së, për shkak se nuk kam funksionuar si kryetar komune vetëm I LDK-së. Momenti që zgjidhesh nuk je më parti, por je kryetar i gjithë qytetarëve pa dallime. Përgjegjësia e marrjes së shumicës mbi pakicën është imediate e patjetërsueshme”, ka thënë ai.
Haliti tutje ka theksuar se ai i ka realizuar 18 premtimet që i ka dhënë para qytetarëve të Vitisë gjatë fushatës zgjedhore.
“18 premtimet i kemi realizuar. 7 të filluara kanë përfunduar për shkak se kanë qenë projekte dyvjeçare, tri janë në përfundim e sipër dhe një ka filluar, pra ne jemi me premtime duke i tejkaluar”, ka bërë të ditur Haliti.
Në fund, ai është shprehur optimist se LDK-ja përveç komunave të cilat i udhëheq aktualisht do të marrë edhe komuna të tjera si Gjilani, Podujeva, Suhareka, Kamenica dhe Shtimja.
“Besimi real i LDK-së është që do të fitojë edhe komuna tjera për shkak se në nëntë komuna ka udhëhequr shkëlqyeshëm dhe janë pretendentë serioz. Natyrisht verdiktin e japin qytetarët, por në bazë të rezultateve punës, sukseseve sigurisht që do t’i ruajmë por edhe komuna të tjera për shembull Gjilanin, Podujevën janë dy komuna që unë besoj se do t’i fitojmë, pastaj është Suhareka, pastaj ka mundësi ta fitojmë edhe Shtimen e Kamenicën dhe me rikthy Vushtrrinë”, ka theksuar ai.
