Takimi inaugurues i Komisionit të Përbashkët për të Pagjeturit në mes Kosovës dhe Serbisë me ndërmjetësim të Bashkimit Evropian dështoi të mërkurën.
Pala serbe e anuloi takimin, me arsyetim të mbylljes së strukturave paralele në Kosovë.
Qëndrim e Serbisë e sheh si kryekëput politik, Qeveria e Kosovës.
“Fatkeqësisht Serbia vijon ta politizojë çështjen e personave të zhdukur me dhunë, e ta instrumentalizojë atë për të fshehur të vërtetën mbi fatin e të pagjeturve. Kjo është çështje humanitare që ka nevojë për adresim urgjent. Refuzimi për t’u takuar dje në Bruksel në kuadër të Komisionit të Përbashkët, është refuzim i Serbisë për të zbardhur të vërtetën e fatit të të pagjeturve. Sepse Serbia nuk është e gatshme të përballet me të vërtetën e saj historike, krimet e barbaritetin e së kaluarës, për sa kohë është e njëjta kastë politike që vazhdon të udhëheqë me vendin. Bashkimi Evropian duhet ta dënojë më fuqishëm e zëshëm mungesën e ecjes përpara me këtë çështje për shkak të destruktivitetit të Serbisë”, ka thënë Klisman Kadiu, këshilltar i zëvendëskryeministrit Bislimi.
Që Serbia është fajtore e thotë edhe kryetari i Shoqatës së Invalidëve të Luftës, Xhevdet Qeriqi.
Faj Serbisë i vë edhe njohësi i çështjeve politike, Visar Xani.
Të mërkurën, Policia e Kosovës mbylli 28 struktura paralele serbe dhe 5 qarqe komunale të tyre në Republikën e Kosovës.
