Ministri i Financave, Hekuran Murati, ka deklaruar se ka raportime që disa punonjës të Byrosë Kosovare të Sigurimit po i detyrojnë mërgimtarët që të paguajnë polica kufitare për së dyti, pasi ajo nga 1 korriku po subvencionohet nga Qeveria e Kosovës. Për këtë kanë reaguar nga Byroja Kosovare e Sigurimeve, duke sqaruar marrëveshjen që e kanë me ekzekutivin. E Tëvë1 të martën qëndroi në piken kufitare në Merdare, për të parë se a po paguajnë mërgimtarët për këtë policë kufitare.
Pas 17 orëve udhëtim, arritën në Kosovë.
E gjëja e parë që e bëjnë këta mërgimtarë në vendlindje, është ndalja para kabines të vogël në Merdare.
Në hyrje të Kosovës, secili prej tyre, duhet të pajiset me policën e sigurimit kufitar.
Por këtë vit, mërgimtarët thonë se nuk po paguajnë për të.
Kjo pasi nga 1 korriku, kjo policë po subvencionohet nga Qeveria e Kosovës.
“Sivjet s’kemi paguar, vitin e kaluar po. Qeveria po na i paguan sivjet. Unë s’e kam ditë, polici më tregoi, e ki pa pare e shko merre sigurimin, a unë i nxora 20 euro”, thotë mërgimtari Jetullah Rama.
“Për një muaj ditë na i dhanë pa pare, i falenderojmë shumë, po na presin mirë”, shprehet Fatmir Salihi.
E një tjetër mërgimtar, thotë se ky vendim duhet të vazhdojë edhe në vitin e ardhshëm.
“Ma merr mendja që është mirë, vitin e ardhëm ju thashë, a do të jetë njëjtë? Përndryshe, vijmë shpesh nga Sllovenia, sepse jemi hasjan, kemi furrë të bukës”, shprehet një tjetër mërgimtar
E të martën nuk patën nevojë të paguajnë as mërgimtarët që qëndruan më gjatë në vendlindje.
“Sigurimi i Kosovës që më ka dalë, prej shkurtit që jam këtu, e kam pasur për dy muaj, më ka dalë me 05.08 dhe erdha me vazhdu sigurimin dhe me thanë që qeveria deri në dhjetor e ka bërë, çdo muaj pa pagesë”, tha Valenton Sadiku.
Por, ministri i Financave, Hekuran Murati, thotë se në disa raste, mërgimtarët sivjet paguan për këtë dokument.
E kjo sipas tij, për faj të disa punonjës të papërgjegjshëm të Byrosë Kosovare të Sigurimit.
“Kemi raportime nga disa bashkatdhetarë se punonjës të papërgjegjshëm të Byrosë Kosovare të Sigurimit nuk informojnë saktë që polica kufitare është e subvencionuar, dhe madje edhe i detyrojnë bashkatdhetarët që të paguajnë për së dyti, për polica që tashmë janë të paguara nga Qeveria”, u shpreh Murtati.
E Muratit të martën, iu kundërpërgjigjen nga BKS.
Përmes një komunikate, këta sqaruan marrëveshjen që e bënë me ekzekutivin.
“Pra, vetëm policat një mujore janë pa pagesë, policat me afat tjetër, si ato 15 ditë, 2 muaj, 6 muaj dhe një vjeqare, janë me pagesë. Pagesës i nënshtrohen të gjitha llojet tjera të automjeteve, poashtu edhe nëse vijnë nga shtetet e specifikuara si më lartë”, thuhet nga BKS.
Nga BKS kanë kërkuar që çdo qytetar që ka paguar policën 1 mujore e që duhet ta kishte marrë falas, ta kontaktojë këtë byro për rimbursim dhe raportim të rastit.
