Superylli i NBA-së, LeBron James, thotë se do t’i duhet kohë për të vendosur nëse do të kthehet për sezonin e 23-të, pasi skuadra e tij, Los Angeles Lakers, u eliminua që në raundin e parë të playoff-eve nga Minnesota Timberwolves të mërkurën.
“Nuk e di,” tha James kur u pyet se sa vite të tjera do të luante. “Nuk kam përgjigje për këtë. Është diçka për të cilën ulem me familjen time, gruan time dhe grupin tim mbështetës, dhe thjesht e diskutojmë, shohim se çfarë ndodh dhe thjesht bisedojmë se sa gjatë dua të vazhdoj të luaj”, shtoi ai.
James, i cili mbushi 40 vjeç më 30 dhjetor, mesatarisht shënoi 24.4 pikë, 7.8 kërcime dhe 8.2 asistime për ndeshje në një sezon që solli një sërë arritjesh të reja, por jo një titull të pestë pas dy titujve që fitoi me Miamin në 2012 dhe 2013, atij që fitoi me ekipin e qytetit të tij, Cleveland, në 2016 dhe titullit të tij të vitit 2020 me Lakers .
Tashmë koshashënuesi më i mirë i të gjitha kohërave në ligë, në mars James u bë lojtari i parë që grumbulloi 50,000 pikë në karrierën e tij.
Ai iu bashkua ikonës së NBA-së, Michael Jordan, si lojtarët e vetëm që shënuan 40 pikë në moshën 40-vjeçare, kur shënoi 42 pikë në fitoren e Lakers ndaj Golden State në shkurt.
Më vonë atë muaj, ai dhe Lakers u fuqizuan nga shtimi i Luka Donci , yllit slloven që udhëhoqi Dallas Mavericks në finale sezonin e kaluar.
Por James tha se gjëja e parë më e rëndësishme që arriti këtë sezon ishte të luante përkrah djalit të tij, Bronny, si dyshja e parë baba-bir që luajti së bashku në një ndeshje të sezonit të rregullt të NBA-së.
Ishte një moment që James e kishte pritur prej kohësh dhe u bë i mundur kur Lakers zgjodhën Bronny James vitin e kaluar.
