Vet avokati i tij, njoftoi se është dëshmitar i Zyrës së Prokurorit të Specializuar.
Me këtë rast, procedura hetimore për spiunazh nga Prokuroria Speciale ndaj Bedri Shabanit, ka mundësi që të bllokohet.
Kjo mund të ndodhë, vetëm në rast se vjen si kërkesë nga Zyra e Prokurorit të Specializuar.
“Prokuroria Speciale e Kosovës mund të vazhdojë me procedura hetimore dhe procedura të përgjithshme gjyqësore ndaj këtij personi, por në rast se Zyra e Prokurorit të Specializuar bën kërkesën tek Prokuroria Speciale të ndërprehen hetimet dhe veprimet hetimore ndaj këtij personi, atëherë në bazë të ligjit për Dhomat e Specializuara, Prokuroria Speciale është e obliguar që ta respektojë kërkesën e ZPS-së”, tha Astrit Kolaj nga IKD.
E këtë çështje nuk e ka komentuar ZPS-ja.
Edhe pse nuk dihet nëse Shabani ka dhënë dëshminë apo pritet që në ardhmen ta bëjë një gjë të tillë, fjalët e tij mund të kontestohen nga pala mbrojtëse.
“Avokatët mbrojtës mund të kontestojnë nëse ky dëshmitar ka dëshmuar, e nëse ky pritet të dëshmojë mund ta kontestojnë si dëshmitar të ardhshëm. Mirëpo, kjo është tërësisht kompetencë e trupit gjykues që të vlerësojnë se a do ta pranojë dëshminë e tij dhe besushmërinë e këtij dëshmitari”, tha Kolaj.
E pikërisht hetimet për spiunazh ndaj një dëshmitari të ZPS-së, po vlerësohet se do t’i ndihmojnë mbrojtjes në çështjen e saj.
“Zbulimi i këtij rasti do të ndikojë pozitivisht tek mbrojtja, pasi kemi të bëjmë më një përson i cili ka rekrutuar persona të tjerë për të dhënë dëshmi të rrejshme. Kështu që, gjetja dhe zbulimi i tij është ndihmesë e madhe për mbrojtjen që të diskreditohet një person i cili ka rektuar njerëz për të dhënë dëshmi të rrejshme”, tha avokati Kadri Osaj.
Aktualisht Bedri Shabani, bashkë me të dyshuarin tjetër për spiunazh, Muharrem Qerimi, janë në paraburgim në kohëzgjatje prej 30 ditësh.
