Ka mbi një vit që janë refugjatë.
Por, një zgjidhje për palestinezët e Gazës, e propozoi të dielën presidenti i ri amerikan, Donald Trump.
Ky i fundit tha se vendlindja e palestinezëve tashmë është shkatërruar.
Për këtë, 1 milion e gjysmë prej tyre, duhet të zhvendosen në shtetet e rajonit.
Por, i menjëhershëm ishte reagimi i qeverive të Egjiptit dhe Jordanisë, të cilët e refuzuan propozimin e shefit të Shtëpisë së Bardhë.
E emri i një shteti tjetër që mund t’i strehonte palestinezët, u përmend në Izrael.
“Administrata e Trumpit është në bisedime me qeverinë në Tiranë për migrimin e 100 mijë palestinezëve në këtë shtet. Burimet nga Izraeli besojne që Egjipti dhe Jordania do të refuzojnë strehimin e refugjatëve dhe thonë se opsionet si Shqipëria dhe Indonezia janë më të realizueshme”, ka deklaruar gazetari izraelit, Amit Segal.
E këto pretendime, i mohoi kategorikisht kryeministri shqiptar, Edi Rama.
“Nuk kam dëgjuar diçka kaq të pavërtetë për shumë kohë – dhe ka pasur shumë lajme të rreme kohët e fundit! Nuk është absolutisht e vërtetë. Respekt dhe solidaritet të plotë me popullin e Gazës, i cili është dehumanizuar nga regjimi i egër i Hamasit dhe ka duruar një luftë djallëzore pas tmerreve mesjetare të 7 tetorit. Por më lejoni të jem i qartë: Shqipërisë nuk i është kërkuar nga askush dhe as nuk mundemi as e mendojmë të marrim përsipër një përgjegjësi të tillë”.
E deklarata e Trump për zhvendosjen e palestinezëve, u diskutua edhe të hënën në emisionin Matrix në Tëvë1.
“Do t’i duhet SHBA-së dhe presidentit Trump të gjej një ekuilibër mes nevojave të të gjitha palëve. Pse e thashë këtë gjë? Sigurisht sot mund të ketë disa ide për Gazën, por asnjë vendim as i Izraelit as i SHBA-së nuk do të kalohet pa pasur “OK” nga vendet arabe. Tashmë ka ardhur përgjigja nga Egjipti dhe Jordania të cilat janë kundër, por ajo që udhët ta shikojmë, është Arabia Saudite e Katari”, ka thënë eksperti i politikave të sigurisë dhe Gjeopolitikës, Ilir Kulla.
Menjëherë pas arritjes së një armëpushimi mes Izraelit dhe Hamasit, refugjatët palestinezë kanë filluar kthimin në vendlindje.
