Publicisti Kim Mehmeti, ka komentuar të mërkurën në emisionin “Këndi i Debatit” në Tëvë1 mundësinë e shkapërderdhjes së koalicionit VLEN dhe pasojat e saj në politikën shqiptare.
Mehmeti ka vlerësuar se koalicioni nuk ka qenë asnjëherë i bashkuar, pasi sipas tij nuk ka ideologji apo koncept të përbashkët.
“Ai koalicion kurrë nuk ka qenë bashkë. Bashkë mund të jetë vetëm ajo që ka një ideologji dhe koncept të përbashkët. Ata nuk kanë asgjë të përbashkët, përveç faktit që e dinë që individualisht nuk vlejnë shumë, dhe vetëm të bashkuar mund të bëjnë diçka dhe të ulen në një qeveri alternative. Por kur bashkohen, interesat personale shpesh krijojnë konflikte. Kryetarët e partive bëhen të tjerët të rangut të dhjetë dhe anëtarësia re reagon ndaj përfitimeve jo të barabarta. Në fund, ata përballen me absurdin e vet”, ka thënë ai.
I pyetur mbi ndikimin e shkapërderdhjes së VLEN-it në politikën shqiptare, Mehmeti ka thënë se shkapërderdhja eventuale e koalicionit nuk do të ketë ndikim tek qytetarët, por vetëm tek ata që synojnë pozita në qeveri.
“Asgjë nuk do të thotë, as nuk do të vërehet. Nuk ka ndikuar as bashkimi i tyre, as një eventuale copëtim. Do të vërehet vetëm tek ata që kanë ambicie të bëhen ministra, sepse poshtë tek populli nuk ka ndonjë efekt”, ka theksuar Mehmeti.
Ndërkohë, për raportin e VLEN-it me përfaqësimin në qeveri, Mehmeti ka shtuar se situata nuk do të ndryshojë, duke argumentuar se kryeministrit të Maqedonisë nuk i konvenon një forcë shqiptare e fortë.
“As aty nuk do të vërehet ndryshim, sepse kryeministrit të Maqedonisë nuk i konvenon asnjë forcë shqiptare e fortë, as VLEN-i, as BDI-ja. VLEN-i e pasqyron mjaft mirë atë që tentojnë qarqet politike dhe policore maqedonase: të copëtojnë, të bëjnë copa, pa u marrë me popullin shqiptar”, ka përfunduar ai.
