Fillimi i muajt qershor do të jetë edhe nisja e një epoke të re për bizneset.
Kjo pasi që nga data 1 e muajit të ardhshëm 1300 biznese do ta dalin në treg të hapur për blerjen e energjisë elektrike.
Kështu Kompanitë do të kenë mundësinë të zgjedhin vetë furnizuesin e energjisë elektrike.
Por këtë vendim të Zyrës së Rregullatorit të Energjisë është duke e kundërshtuar Oda Ekonomike e Kosovës.
“Arsyeja më e madhe është se nuk është përgatitur tregu nga ana e institucioneve kompetente, nga ZRRE-ja, nga Qeveria, nga gjithë që janë kompetent. Nuk është përgatitur tregu. Të ofrohet ofertë vetëm prej një ofertuese, kjo nuk është treg i lirë. Tregu i lirë do të thotë që ti ke shumë ofertues dhe çmimi i energjisë elektrike e ke me lirë se që e ke pas. Se sa ka qenë serioze përgatitjet e tregut, tregon fakti që para dy ditëve janë licencuar dy- tre furnizues të ri”, ka thënë Lulëzim Rafuna.
E nëse qeveria nuk reflekton sipas kryetarit të kësaj ode, Lulëzim Rafuna bizneset do të mblidhen përsëri të hënën për të parë se si do të veprohet.
E gjatë ditës Partia Demokratike ka nisur edhe hapat ligjor që të anulohet ky vendim.
“ZRRE ka vepruar pa marrë parasysh reagimet e shoqërisë civile, odave ekonomike dhe organizatave profesionale, dhe pa përmbushur as parakushtet që vetë i kishte përcaktuar për një proces të sigurt dhe të drejtë të liberalizimit të tregut. Ky vendim është marrë në mungesë të një analize të konkurrencës, si dhe pa konsultim me institucionet përgjegjëse, si Autoriteti Kosovar i Konkurrencës dhe Zyra e Ndihmës Shtetërore. Siç ka vërejtur qartë edhe Institucioni i Avokatit të Popullit, ky vendim cenon interesat legjitime të një komuniteti të gjerë ekonomik, duke krijuar kushte për një krizë të re sociale në vendin tonë”, ka përfunduar Abelard Tahiri.
Por a mundet ligjërisht të sfidohet vendimi i ZRRE-së?
“Pa dyshim që mund të sfidohet ligjërisht, mirëpo duhet të kujtojmë që vetëm ka pasur një sfidim nga grupet e interesit respektivisht nga personat që preken direkt nga vendim dhe kemi një vendim të Gjykatës që e ka refuzuar masën e përkoheshme. Është e vështirë që të argumentohen kushtet ligjore për me pezullu një vendim të tillë sepse duhet të kemi të qartë nëse nuk kanë me pagu bizneset respektivisht nëse bizneset nuk kanë me hy në treg të hapur kostos e mos hyrjes do të paguajnë qytetarë”,ka thënë Qëndrim Arifi, jurist.
Megjithëkëtë juristi, Qëndrim Arifi ka një këshillë për të gjitha bizneset.
“Në aspekt juridik unë i kisha sugjeru që duhet të hyjnë patjetër me operatorët të gjithë këta që i kanë plotësuar kërkesat ligjore për të dal në treg të hapur, por i kisha sugjeruar brenda mundësive të lidhin marrëveshje afat shkurtët pasi ideja është pritet që shumë shpejt të hyjnë edhe operatorët tjerë në treg që do të ofrojnë shërbim, pra energjinë për këto biznese në mënyrë që edhe tregu për ta të jetë më konkurse por do të mund të nxjerrin oferta me të lira”, ka përfunduar Arifi.
Me kërkesë të Zyrës së Rregullatorit për Energji në Kosovë (ZRRE), të gjitha kompanitë me mbi 50 punëtorë ose me qarkullim mbi 10 milionë euro, do të dalin në tregun e hapur të energjisë nga 1 qershori.
