Në secilin hap që bën, pranë e ka mbrojtjen e afërt.
Këta kujdesen për sigurinë e kryeministrit të Kosovës, Albin Kurti.
Por, burrat afër kryeministrit nuk mund ta mbrojnë atë nga urdhrat e ligjshëm të Gjykatës, nëse ky organ lëshon urdhër arrest për mos paraqitjen në Prokurorinë Speciale për dëshmi në rastin e rezervave shtetërore.
Avokati Naim Rudari, tregon se mandati i mbrojtjes së afërt është për ruajtjen e Kurtit vetëm në rast të ndonjë kërcënimi.
“Mbrojtja e afërt nuk mund ta mbrojë kryeministrin nga urdhërat e ligjshëm të Gjykatës. Pra urdhëri i Gjykatës është obligativ për të gjithë e sidomos për ata që ju drejtohet, në këtë rast nëse Gjykata lëshon urdhër për sjelljen e tij forcërisht në Prokurori apo burgosjen e tij sepse kështu parashihet ligjërisht nuk ka shumë alternativa pra Ligji ka paraparë që të burgoset dhe nëse ai refuzon, nëse ai sillet në Prokurori dhe pranon që mund të deklarohet atëherë mund të vazhdojë deklarimin e tij dhe të lirohet..”, thotë Rudari.
Edhe avokati Xhevdet Smakiqi vlerëson se nuk mund të pengohet arrestimi i Kurtit nga kjo njësi pasi që nuk ka mekanizëm që mund të shpërfillë urdhrat e Gjykatës.
“Për këtë rast që po ftohet të dëshmojë nuk gëzon ndonjë imunitet ashtu që urdhëri i Gjykatës është i formës së prerë në qoftë se lëshohet për paraburgim dhe atëherë Policia duhet ta zbatojë dhe asnjë person dhe as zyrtarët policorë që janë në mbrojtjen e afërt të kryeministrit Kurti nuk kanë ingirenca dhe kompetenca për të penguar zbatimin apo ekzekutimin e urdhërit për paraburgim”, shprehet Smakiqi.
Tëvë1 ka pyetur Prokurorinë Speciale dhe Gjykatën Themelore në Prishtinë se cilat do të jetë masat ndaj Kurtit, por që deri në publikimin e kronikës nuk kanë kthyer përgjigje.
