Formimi i Qeverisë së re pas zgjedhjeve të 9 shkurtit dhe mundësia e formimit nga Lëvizja Vetëvendosje si fituese e zgjedhjeve ka përballë në mendime analistët në studion e “Info Natës” në Tëvë1.
Përderisa profesori dhe diplomati, Blerim Canaj e sheh të vështirë formimin e qeverisë nga Lëvizja Vetëvendosje pas deklarimit të Kurtit të hënën, njohësi i çështjeve politike, Selam Shkodra beson se Vetëvendosje do ta formojë qeverinë.
Canaj vlerëson se Kurti aktualisht nuk i ka numrat për ta formuar qeverinë duke pas parasysh edhe deklarimet e partive opozitare që janë shprehur kundër bashkëpunimit me Kurtin.
Madje ai nuk beson që as kreu i Nismës, Fatmir Limaj nuk do t’i bashkohet Kurtit pavarësisht se pak ditë pas zgjedhjeve Limaj nuk e kishte përjashtuar si mundësi.
“Deri më tani nuk e di se si do ta formojë sepse numrat i dalin me vështirësi. Unë ende nuk besoj që z.Limaj është i gatshëm të bëjë koalicion me Lëvizjen Vetëvendosje, por hipotetikisht po thamë nëse z.Limaj dhe dy deputetë tjerë të tij shkojnë prapë nuk e di si do të bëhen numrat. Është vështirë e mundur”, ka thënë Canaj.
Por, për Selam Shkodrën mundësia e formimit të qeverisë së re nga Vetëvendosje është e mundur.
Madje ai ka përmendur edhe deklarimet e kryetarit të VV-së, Albin Kurti dhe nënkryetarit, Glakuk Konjufca, të cilët janë shprehur se do ta formojnë qeverinë.
“Kem dy deklarata të dy zyrtarëve të lartë të Vetëvendosjes, (Albin Kurti dhe Glauk Konjufca), të cilat tingëllojnë bukur shumë bindëse se Lëvizja Vetëvendosje do të jetë formuese e qeverisë së ardhshme e cila del nga zgjedhjet e 9 shkurtit, dhe mendoj që këta dy personazhe që janë eksponentët kryesorë të politikë bërjes brenda Vetëvendosjes besoj fuqishëm se tashmë i kanë bërë llogaritë për faktin që një deklarim të tillë e kanë dhënë në fund të procesit të numërimit”, ka thënë Shkodra.
Ai ka thënë se mund të ketë rirreshtime në këtë mandat nga deputetët por edhe partitë politike.
