Më 26 tetor, kryeministri në detyrë, Albin Kurti e ka afatin e fundit për formimin e Qeverisë Kurti 3.
Por Lëvizja Vetëvendosje ende nuk ka bërë hapa në këtë drejtim.
Kurti gjatë së martës tha se ende nuk kanë komunikuar me partitë e tjera, por siç tha ai, për këtë ka ende kohë.
“Tepër shumë punë këto ditë. Analiza e rezultateve nga qendrat. Duhet të shohim kontributet që kanë pasur fushatat në komuna me rezultatin që kemi arritur në mënyrë që sa më shpejt të fillojmë fushatën për balotazhe. Andaj dje dhe sot nuk kam arritur ende të zhvilloj ato komunikime, por po e bëjmë një plan për këtë gjë. I kemi më shumë se dhjetë ditë”, ka thënë Kurti.
Por njëri nga ish ministrat e Kurtit e tashmë edhe nënkryetar i Kuvendit të Kosovës nga komuniteti serb, Nenad Rashiq e ka një dëshirë.
Ai thotë se e preferon koalicionin qeverisës Vetëvendosje dhe Lidhja Demokratike e Kosovës.
“Unë kisha qenë i gëzuar që të kemi një qeveri një mazhorancë stabile për shkaqe të sfidave që kemi, për shkak të marrëdhënieve ndërkombëtare, prandaj unë kisha qenë i gëzuar që të jetë LVV të bëjë koalicion me LDK, atëherë do të kishim pas një numër më të madh të deputetëve, nëse isha vetë unë në ndonjë formë ose një moment do të inkurajojë Kurtin që është e mundshme një koalicion të lind sepse siq kemi konfirmuar edhe më herët kanë treguar një seriozitet institucional dhe unë e vlerësoj një gjë të tillë”, është shprehur Rashiq.
Që nuk kanë kushte për t’ia bërë numrat Albin Kurtit, e thanë edhe nga Nisma Socialdemokrate.
Deputetja e këtij subjekti politik, Xhevahire Izmaku nënvizon nevojën që të “sqarohet pozita e kryetarit të Kuvendit”, pasi sipas saj, legjislativi nuk duhet të funksionojë me një figurë e cila ka krijuar përçarje.
Televizioni ka provuar të marrë një qëndrim edhe nga Lidhja Demokratike e Kosovës për deklaratat e nënkryetarit nga komuniteti serb, Nenad Rashiq por të njëjtit nuk kanë kthyer përgjigje.
