Një person është arrestuar të enjten nën dyshimin për veprën penale “Trafikim me njerëz”.
Kjo dukuri vazhdon të jetë prezente në qytete të ndryshme të Kosovës.
Kjo meqë sipas statistikave të Policisë, vetëm gjatë periudhës janar-gusht 2025 janë evidentuar shtatë raste ‘trafikimi me njerëz’ dhe 19 raste ‘mundësimi ose detyrimi në prostitucion’.
“Gjatë periudhës janar-gusht 2025 janë evidentuar 7 raste ‘trafikimi me njerëz’ dhe 19 raste ‘mundësimi ose detyrimi në prostitucion’. Kurse gjatë vitit 2024 janë evidentuar 8 raste ‘trafikim me njerëz’ dhe 27 raste ‘mundësimi ose detyrimi në prostitucion’”, thuhet nga Policia e Kosovës.
E ish- koloneli Refki Morina, tregon se kjo është formë e krimit të organizuar e që bëhet me qëllime përfituese.
“Kjo te trafikuesit është fitimprurëse se personat e tillë që trafikojnë janë persona të cilët në një mënyrë vijnë nga shtet që janë të rrezikuara : jeta, shëndeti i tyre, në aspektin fetar, në aspektin politikë dhe i shfrytëzojnë viktimat e tilla duke i kaluar nga një shtet në një tjetër dhe këto lidhshmëri bëhen në vendet ballkanike, si: Kosova dhe Maqedonia që mund të barten he kanë përfitime të ndryshme të parave e pasurisë. Kemi strategjinë mbi luftimin e qenieve njerëzor trafikimin. Kjo strategji parasheh mekanizmat e tërësishëm të luftimit edhe në aspektin e sigurisë, shëndetësisë”, shprehet Morina .
Se kjo vepër penale ka sanksione të ashpra e thotë edhe avokati Anton Nrecaj.
Por që sipas tij sistemi gjyqësor lë për të dëshiruar në shqiptimin e dënimeve në të tilla raste.
“Dënimi minimal me burgim është 5 deri në 12 vite burgim për rastin që po flasim, por Kodi Penal jep hapësirën edhe të shqimit me gjobë e që dënimi max është deri në 500 mijë euro. Por në qoftë se i referohemi Kodit Penal dhe praktikave gjyqësorë lë për të dëshiruar sepse nuk kemi shqiptimin e dënime adekuatë sa i përket çështjes së trafikimit të qenieve njerëzore”, thotë Nrecaj.
Në rrethana të tilla, viktimat e trafikimit mbështeten nga institucionet.
“Korniza jonë ligjore është e harmonizuar sepse viktimat e trafikimit me qenie njerëzore kanë mbështetje nga shteti qoftë në aspektin e përfaqësimit në gjykatë, qoftë në aspektin e kompensimit të dëmit si viktimë dhe mbrojtës së tyre si viktimë edhe integrimit nëse është viktimë brenda territorit të Republikës së Kosovës apo është shtetase e Kosovës. Ndërsa, për ato viktima që vijnë nga vendet jashtë territorit të Kosovës i mundohet riatdhesimi”, thotë Nrecaj.
Sipas të njëjtit, dënimi ndaj një vepre të tillë penale, dallon gjithashtu edhe në qoftëse viktimat janë të mitur.
