Ministrja në detyrë e Punëve të Jashtme dhe Diasporës, Donika Gërvalla, ka folur për situatën e koalicionit Lvv-Guxo dhe për rolin e partisë Guxo në zgjedhjet e fundit, gjatë emisionit “Këndi i Debatit” në Tëvë1. Ajo u shpreh për përfshirjen e partisë Guxo në listën e LVV-së dhe se si ky koalicion ka ndikuar në procesin zgjedhor.
Gërvalla shpjegoi se, në krahasim me vitin 2021, kur ata u bënë pjesë e listës së LVV-së, këtë herë koalicioni është i regjistruar në KQZ, që do të thotë se pas fitimit të zgjedhjeve, Guxo trajtohet si pjesë e koalicionit dhe ka të drejta dhe detyrime të përbashkëta.
“Në dallim nga viti 2021, kur ne u bëjmë pjesë e listës së LVV-së, këtë herë koalicioni është i regjistruar në KQZ. Kjo do të thotë që, pas fitimit të zgjedhjeve, ne trajtohemi si një parti e koalicionit me të gjitha benefitet dhe detyrimet që i ka,” tha Gërvalla.
Ministrja theksoi se, ndonëse listat janë paraqitur me logon e LVV-së, ka ende hapësirë për të vendosur simbolet e tjera, përfshirë atë të Guxo-s, në përpjekjet për të mbajtur identitetin e partisë.
“Kjo listë është vetëm një postim i LVV-së, sepse edhe ne mund ta bënim me ngjyrë të kaltër dhe ta vendosnim këtë listë, por këto janë simbolet. Ne ende nuk kemi filluar, sapo kanë dalur emrat dhe numrat, nuk kanë filluar përgatitjet. Ne kemi përgatitur planin, dhe me partitë e tjera do të vazhdojmë,” shtoi Gërvalla.
Në lidhje me spekulimet për shkrirjen e Guxo-s në LVV, Gërvalla u shpreh se këto janë thashetheme dhe propagandë që nuk kanë bazë.
“Dikush thotë se është shkrirë, dikush thotë se është bashkëautorësi, por shumë njerëz vendosin ta lexojnë si të duan. Këto janë vetëm shpifje pa bazë. Ka pasur shumë thashetheme që kanë bërë propagandë kundër, por suksesi i kandidatëve në zgjedhjet e shkurtit dhe ato lokale ka treguar diçka tjetër,” u shpreh Gërvalla.
