Më 24 nëntor të vitit 2024, Toga Ceremoniale në kuadër të FSK-së, u angazhua në një ceremoni mortore në veri të vendit.
Kjo solli edhe shqetësim nga ana e KFOR-it, pasi për çdo lëvizje të FSK-së në pjesën veriore të territorit të Kosovës duhet koordinim me KFOR-in, ashtu siç është përcaktuar në letrën e zotimit të vitit 2013, nga ish kryeministri Hashim Thaçi.
Për mungesën e koordinimit të 24 nëntorit 2024, ministri i Mbrojtjes iu drejtua me letër KFOR-it, duke e quajtur si të paqëllimshme, pavarësisht ndjeshmërisë së çështjes.
“Mund t’ju siguroj se prania e Togës Ceremoniale në aktivitetin e përmendur në Bistricë pa miratimin paraprak nga KFOR-i ndodhi për shkak të një keqkoordinimi të brendshëm dhe ishte krejtësisht e paqëllimshme. Duke njohur ndjeshmërinë e çështjes, dua t’ju siguroj se kam ndërmarrë të gjitha veprimet e nevojshme dhe kam udhëzuar udhëheqësinë e FSK-së të marrë masa adekuate për të parandaluar gabime të ngjashme në të ardhmen”, thuhet nw letrën e Maqedoncit.
Moskomunikimi për dërgimin e kësaj njësie në veri, dyshohet se mund të jetë përdorur edhe si testim për KFOR-in nga ana e ekzekutivit.
“Po ta kishin njoftuar KFOR-in me kohë që është fjala për një njësi ceremoniale, nuk do ta pengonin. Por në këtë mënyrë siç është vepruar është marrë mbase edhe si provokim apo edhe si testim i qeverisë së Kosovës në reagimin e KFOR-it, në situata të tilla”, vlerëson Hysen Gecaj, ish-ushtarak.
Këto lloj veprimesh, vlerësohet se dëmtojnë marrëdhëniet mes Kosovës dhe KFOR-it.
“Këto veprime e dëmtojnë shumë marrëdhënien e Kosovës me vendet anëtare të NATO-s, të cilët realisht po bëjnë një përpjekje të jashtëzakonshme që Kosovën ta kenë në këtë familje tejet të rëndësishme të sigurisë, e cila është familja më e rëndësishme e sigurisë në glob. Dhe këto veprime nuk duhen të përsëriten dhe besoj që do të kenë një impakt në një afat të caktuar sa i përket çështjes së progresit apo proceseve që FSK i ka në raport me integrimin e saj në këtë familje”, thotw Bedri Elezi njohës i sigurisë.
Sipas ministrit të Mbrojtjes, Ejup Maqedonci, kjo letër nuk është rizotim për mosdërgimin e FSK-së në veri pa miratim të KFOR-it, por vetëm sqaruese për situatën e nëntorit të vitit të kaluar.
