Politologu Avdi Smajlaj ka thënë se shqiptarët dhe partitë atje do të duhej që të dilnin në mbështetje të protestave që janë duke u zhvilluar në Serbi.
Kjo pasi sipas tij sa me demokratike të jetë Serbia aq më tepër përfitojnë shqiptarët atje.
“Parimisht mendoj që partitë shqiptare në këtë rast do të duhej që t’i mbështetshin protestat pro demokracisë. Do të duhej pasi sa më demokratike të jetë Serbia ndër ata që do të fitojnë do të jenë vet shqiptarët, sepse do të kenë më shumë të drejta më shumë përfaqësime. Pra, do të duhej të ishin atje edhe shqiptarët edhe partitë politike një zë i fuqishëm mbështetës sepse përfitojnë direkt…”, ka thënë ai në emisionin “Këndi i Debatit” në Tëvë1.
Ndryshe, për më shumë se dy muaj, studentët në Serbi janë duke bllokuar dhjetëra fakultete në të gjithë vendin. Ata kërkojnë përgjegjësi penale dhe politike për aksidentin në Novi Sad, ku nga shembja e një strehe në Stacionin Hekurudhor të qytetit, më 1 nëntor të vitit të kaluar, humbën jetën 15 persona.
Javëve të fundit, ata janë në krye të protestave masive që zhvillohen në shumë bashki e qytete. Studentëve u bashkohen edhe mijëra qytetarë të tjerë.
