Autor: Besarta Mehmeti
Përveç që u kritikua për qasje në dialog, ajo u kritikua edhe për menaxhimin jo të mirë të pandemisë, zhvillimin ekonomik, krizën me energjinë, kriza e çmimeve si dhe kapja e bordeve. Së fundmi, kjo qeveri ka marrë kritika edhe për punën e bërë nga ministrat në dikasteret e tyre.
Ministrja e Punëve të Jashtme, Donika Gërvalla që kur ka marrë pozitën e saj është kritikuar për “huqjet” që ka bërë gjatë këtij viti si ministre, e për të cilën është kërkuar edhe dorëheqja.
Pas arrestimit të një numri të madh të Policëve kohëve të fundit, dorëheqje nga pozita e ministrit i është kërkuar edhe Xhelal Sveçlës i cili drejton Ministrinë e Punëve të Brendshme. Një gjë e tillë është kërkuar edhe nga ministrja e Arsimit, Arbërie Nagavci, ku para disa ditësh, Kushtetuesja vendosi që kjo ministri nuk kishte pasur të drejtë me vendimin për ndërprerje të reformës në arsim në Kamenicë, të nisur nga ish kryetari i kësaj komune, Qëndron Kastrati.
Kësaj pune nuk i ka shpëtuar as ministrja e Industrisë, Ndërmarrësisë dhe Tregtisë, Rozeta Hajdari, e cila ishte përfshirë në një aksident trafiku, ku teksa po drejtonte veturën e saj personale, në të cilin aksident gjithashtu ishin përfshirë edhe dy fëmijë.
Se a duhet një riformatim i kabinetit qeveritar, për këtë ka folur, Njomëza Arifi nga GLPS. Ajo në një përgjigje për Teve1.info ka thënë se planifikimi dhe koordinimi i qeverisë nuk ka qenë në nivelin e dëshiruar gjatë kësaj periudhe të qeverisjes.
Arifi thotë se mangësi vërehen në avancimin disa proceseve dhe nismave që pritej të përfundonin brenda vitit 2021, dhe brenda një viti qeverisje.
“Mangësi të konsiderueshme vërehen në avancimin e disa proceseve dhe nismave që pritej të përfundonin brenda vitit 2021, dhe brenda një viti qeverisje e të cilat janë të një rëndësie shumë të madhe. Përshembull, reforma në administratën publike, së bashku me racionalizimin e agjencive të pavarura është paraparë të përfundojë në vitin 2021 por një gjë e tillë nuk ka ndodhur ani pse është ndër proceset reformuese më të rëndësishme, sidomos për procesin integrues të vendit por edhe reformimin e brendshëm fillimisht. Objektivat e paraqitura për politikën e jashtme të Kosovës, siç është ligji për shërbimin e jashtëm, i cili ishte paraparë të zbatohej në vitin 2021. Këto procese nuk janë përfunduar dhe zbatuar siç është planifikuar”, ka thënë ajo.
Sipas Arifit, nevojitet shtim i kapaciteteve profesionale në kabinetin qeveritar.
“Planifikimi dhe koordinimi horizontal ndërmjet sektorëve qeveritarë ka qenë mangët në këtë periudhë kohore. Prandaj, shtimi i kapaciteteve profesionale në disa nga kabinetet kyçe ministrore është i nevojshëm dhe i domosdoshëm në shtimin e performancës së qeverisë”, tha ajo.
Ndryshe nga Arifi, Erblin Hoxha nga Lëvizja “Fol”, për Teve1.info ka deklaruar se deri më tani nuk është i dobishëm një riformatim i kabinetit qeveritar, ku këtë e ndërlidhi me veprimet që Qeveria ka marrë në menaxhim të pandemisë e gjendjes ekonomike si dhe pasojës së luftës së Rusisë në Ukrainë.
“Viti i 1 i qeverisë ka pasur shumë veprime të cilat janë ndërmarrë për qëllim të menaxhimit të pandemisë, si dhe gjendjes se rëndë ekonomike si pasojë e pandemisë, si dhe se fundmi edhe si pasojë e luftës se Rusisë në Ukrainë. Në këtë kuptim, riformatimi (ndërrimi i ndonjë ministri/e me dikë tjetër) jo domosdoshmërisht do të sillte ndryshime apo performancë më të madhe. Deri tash, nuk besoj që riformatimi do të ishte i dobishëm, pasi që shumë aspekte të cilat ndërlidhen me funksionim të mirë të qeverisë marrin kohë për të vendosur një strukturë të brendshme të funksionimit, prandaj 12 muaj qeverisje nuk janë të mjaftueshme”, tha Hoxha.
Ai tregon se në cilat ministri duhet të ketë rritje të performancës dhe angazhimit në këtë vit.
“Gjithsesi, nëse ministrat specifik të ministrive si ajo e Punëve të Jashtme dhe Diasporës, Ministria e Brendshme, Ministria e Kulturës, Rinisë dhe Sportit, dhe Ministria e Arsimit, janë disa nga ministritë prej të cilave pritet një rritje e performancës dhe angazhimit në këtë vit, sepse janë ministri që kërkohet punë më e madhe në riformatimin e funksionimit të këtyre dikastereve”, ka thënë Hoxha.
Sipas raportit të Lëvizjes “Fol”, Hoxha thotë se tri ministri kanë dalë me performancën më të ulët në realizimin e planit të punës për këtë periudhë.
“Raporti i Lëvizjes FOL prezanton rezultatet e monitorimit të realizimit të planit të punës për periudhën mars-dhjetor 2021, dhe këtu janë paraqitë statistikat rreth nivelit të realizimit të planit të punës nga të gjitha ministritë përkatëse. Kështu, 3 ministritë me performance më të ulët në realizimin e planit të punës për këtë periudhë janë: 1. Ministria e Mjedisit, Planifikimit Hapësinor dhe Infrastrukturës (28.9% e planit të punës te realizuar), 2. Ministria e Kultures, Rinise dhe Sportit (32.4%) dhe 3. Ministria e Financave, Punës dhe Transfereve (36.5%)”, tha ai.
E për të arriturat dhe dështimet gjatë një viti, kjo Qeveri në krye me Albin Kurtin po vlerësohet me notën shtatë.
“Vlerësimi i përgjithshëm është që ka një zhvillim pozitiv në qeverisje në përgjithësi, mirëpo janë elementet e transparencës, komunikimit me qytetar dhe media, si dhe krijimi i një uniteti të përgjithshëm për zgjidhjen e çështjeve specifike siç është dialogu me Serbinë apo çështjet ekonomike që kjo qeveri duket që ende nuk ka arritur t’i konsolidoj si tema me rëndësi kombëtare. Prandaj nëse e vlerësojmë me note 1-10, këtë qeveri do ta vlerësoja me 6.5-7”, përfundoi Hoxha.
Teve1.info i ka dërguar pyetje edhe Zyrës së Kryeministrit në lidhje me atë se a pritet të bëhet performanca e ndonjë ministri lidhur me realizimin e punës së tyre sipas planit të Punës së Qeverisë dhe se a është duke e shqyrtuar kryeministri ndonjë mundësi për ndryshime në ndonjë ministri, por të njëjtit nuk kanë kthyer përgjigje. /teve1.info/
