Për tetë herë, partia në pushtet Lëvizja Vetëvendosje nuk arriti që ta konstituojë Kuvendin e Kosovës.
E pas këtyre tentimeve, kryeministri në detyrë, Albin Kurti i ka ftuar në takim të enjten të parin e Partisë Demokratike të Kosovës dhe atë të Lidhjes Demokratike.
Ai, të dy liderëve, Memli Krasniqi dhe Lumir Abdixhiku, u është drejtuar me një letër.
“Duke u bazuar ne Kushtetutë, tre nënkryetarë do të jenë nga tri partitë që fituan më së shumti ulëse, andaj ju ftoj për një takim të përbashkët edhe me z. Memli Krasniqi, kryetarin e PDK-së, në sallën N-204 te Kuvendit të Republikës se Kosovës, nesër (e enjte), 1 maj 2025, në orën 8:30. Me shpresë në përgjigje pozitive, ju përshëndes”, thuhet në letrën e Kurtit.
Nga ana tjetër, deputeti nga Vetëvendosje, Mefail Bajqinovci thotë se brenda 10 ditëve do të votohet Albulena Haxhiu për kryekuvendare.
“Ne kemi diskutime me Nismën dhe me partitë minoritare edhe unë besoj që hapi i radhës them gjithmonë pas konstituimit të Kuvendit unë besoj shumë që nuk do të shkoj larg dhe do ta kemi të votuar kryetarin e Kuvendit, në këtë rast Albulena Haxhiun. Pra nuk do të shkoj i bindur jam as dhjetë ditë dhe do të kemi një zhbllokim dhe unë besoj që është duke u diskutuar për modalitetet e marrëveshjeve për koalicionin qeverisës. Nuk besoj që do të kemi bllokadë të gjatë”, ka thwnw Bajqinovci në Tëvë1.
Të martën, edhe Gani Geci tregoi se e ka telefonuar ish kryeparlamentari, Glauk Konjufca për të siguruar votën e vajzës së tij, Marigona Gecit, që është deputete në LDK.
Ish ambasadori i Kosovës, Sylë Ukshini thotë se është dashur më herët të këtë takime të tilla dhe negociata me partitë opozitare.
Të enjten, nga ora 10 është seanca e radhës për konstituimin e Kuvendit të Kosovës.
