Vetura të shumta të anëtarëve të Partisë Demokratike erdhën nga Prishtina në fshatin Burojë të Skenderajt.
Kryetari i PDK-së, Memli Krasniqi, i shoqëruar nga anëtarët e partisë erdhën për ngushëllime tek familja Thaçi, pas vdekjes së kryefamiljarit, Haxhi Thaçi.
Më të rëndë këtë vdekje, Memli Krasniqi thotë se e bën mungesa e Presidentit Thaçi.
“Së paku ai pati mundësi që para pak ditësh të shoh për herë të fundit babin e tij por kjo dhembje shkon e rritet për familjen, për neve të gjithëve për shkakun e mungesës së presidentit Thaçit”.
E për disa orë këtu qëndroi edhe Nasim Haradinaj, që një pjesë të dënimit në Speciale e kaloi bashkë me Thaçin.
“ Bacin Haxhi e kujtoj pak se nuk me ka ra me taku shumë, me shumë e kam takuar pas lirie por duke ia njohur të birin unë e dijë që është brumi e bërthama e tij, prandaj Bacin Haxhi unë e kujtoj si heroin e Hashimit”, ka deklaruar ai.
“Hashimi bashkë me shok e burgosen vetën për mos me burgos Kosovën, pikërisht ata vuajnë atje padrejtësisht ndërsa Kosova të jetë e lirë, kjo është një dhembje e madhe për neve, për mua që e kam njohur që nga vitet e 96, kemi punuar bashkë me djemtë për lirin e Kosovës”, ka deklaruar Hasani.
E vet Presidentit, sipas ish-këshilltarit të tij, Artan Behrami, vështirë se do t’i mundësohet pjesëmarrja në ceremoninë e varrimit.
“Nuk kemi ende informacione, por hapi logjik është që mbrojtja e ka bërë kërkesën për pjesëmarrje e presidentit Thaçi në ceremoninë e varrimit mirëpo duke parë padrejtësitë që janë bërë në vazhdimësi të cilat i ka përdorur kjo gjykatë ndaj krerëve të UÇK-së unë personalisht nuk besoj që të paktën nesër të marrë pjesë në ceremoninë e varrimi”, tha Behrami.
E nga Gjykata Speciale, familjes Thaçi i kanë dërguar ngushëllime edhe ish-krerët e Ushtrisë Çlirimtare të Kosovës, Kadri Veseli, Rexhep Selimi dhe Jakup Krasniqi.
